Pirézidént donald tramp: “Shi jinping bilen alaqiliship turuwatimen”

Pat yéqinda wezipige olturidighan amérika pirézidénti donald tramp xitay kompartiyesi bash sékrétari shi jinping bilen ikki terep wekilliri arqiliq dawamliq alaqiliship turuwatqanliqini bildürgen.

 “Roytérs agéntliqi” ning 6-dékabirdiki xewiride éytilishiche, donald tramp yéqinda bir téléwiziye pirogrammisida riyasetchining so'aligha bergen jawabida shi jinping bilen wasitilik shekilde alaqe qiliwatqanliqini bildürüp, “Biz ularning wekilliri arqiliq dawamliq pikirliship turuwatimiz. Menche biz obdan chiqiship qélishimiz mumkin. Emma yolimiz ayrim” dégen.

Pirézidént donald tramp xitayning izchil türde amérikadin naheq usulda nep élishigha qarshi turup kéliwatqan bolup, saylam mezgilide qilghan sözide xitaydin 60 pirsent baj alidighanliqini, xitaydin kiriwatqan féntalinni cheklesh üchün, yene 10 pirsent baj qoshidighanliqini élan qilghanidi. Pirézidént donald tramp wezipige olturush murasimigha shi jinpingni teklip qilghan bolsimu, shi jinpingning barmaydighanliqi melum bolghanidi.

Xewerde qeyt qilinishiche, xitay tashqi ishlar ministirliqi bayanatchisi go jyashén 1-ayning 7-küni axbarat élan qilish yighinida bergen bayanatida, xitayning her waqit donald trampning sözlirige diqqet qilidighanliqini bildürgen. U yene xitayning “Amérika bilen bolghan soda munasiwitining muqim we saghlam rawajlinishini ilgiri sürüshini, shuningdek bir-birini hörmet qilip, bir-biri bilen hemkarliship ortaq menpe'et élish” ni ümid qilidighanliqini bildürgen.

Közetküchilerning bildürüshiche, donald trampning yéngi hökümet kabéntidiki siyasetchilerning köpinchisi xitaygha qattiq qol bolushni teshebbus qilidighan kishiler bolup, xitay terep buningdin bésim hés qilghan hemde aldi bilen donald trampni mayil qilishning yollirini izdewatqan bolushi mumkin iken.