Xitayda bir doxturxana meshghulat qiliwatqanda mejburiy chéqilghan

Muxbirimiz jüme
2016-01-09
Share


Xitay hökümet xewerliridin melum bolushiche, xitaydiki bir doxturxana normal meshghulat qiliwatqan peytte mejburiy chéqilghan, doxturxana xadimliri 600 ming dollar qimmitidiki doxturxana üskünisining weyranchiliqqa uchrighanliqini bildürgen.

Shinxu'a axbaratining xewer qilishiche, mezkur hadise jéngju uniwérsitétigha tewe bir doxturxanida peyshenbe küni yüz bergen. Melum bolushiche uniwérsitét igidarchiliqidiki 4 - doxturxanining melum qismi sheherning yol kéngeytish qurulushigha toghra kélip qalghan iken.

Doxturlarning yerlik axbarat wasitilirige bildürüshiche, 7 - yanwar herbiylerde ishlitilidighan renglik niqab kiyimi kiygen bir top kishiler doxturxanigha kélip binani topa ittirish mashiniliri bilen türtüshke bashlighan.

Doxturxana réntgén bölümining bashliqi lyu chün'gu'angning shinxu'a agéntliqigha bildürüshiche, u eyni chaghda bir bimarni tekshürüwatqan iken.

Netijide bimarlar qorqup doxturxanidin qéchishqan, doxturxana jeset saqlash öyidiki 6 jeset topa astida qalghan. Doxturxana bashliqi yüen buning jesetlerge qilin'ghan haqaret ikenlikini bildürgen.

BBC Da doxturxana jaylashqan xuyjing rayonluq hökümet bayanatidin neqil élip körsitishiche, doxturxanining CT bölümi we jeset saqlash öyi yol qurulushigha toghra kélip qalghan bolghachqa da'iriler doxturxanidin bu binani özliri chéqip bérishni bir nechche qétim telep qilghan iken.

Ular bayanatida yene, doxturxana chéqilishtin ilgiri boshitilghanliqini, shunga ölüm - yétim hadisisi körülmigenlikini bildürgen bolsimu, doxturlar eyni chaghda doxturxanida normal meshghulat qiliniwatqanliqini, bir qisim xadimlarning yarilan'ghanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet