Amérika dölet mejlisi xitay ishliri ijra'iye komitéti dunya bankisidin Uyghur rayonidiki kishilik hoquq depsendichilikige yardem bérishni toxtitishni telep qilghan

Muxbirimiz jewlan
2022-04-11
Share

Amérika dölet mejlisi xitay ishliri ijra'iye komitéti (CECC) ezaliri dunya bankisining bashliqi dawid malpas (David Malpass) qa xet yézip, xelq'ara pul-mu'amile shirketlirining xitaydiki kishilik hoquq depsendichilikige chétishliq töt shirketke qerz bergenlikidin endishe qiliwatqanliqini bildürgen.

Amérika dölet mejlisi xitay ishliri ijra'iye komitétining tor bétide 11-aprél élan qilin'ghan bu xetke amérika dölet mejlisi kéngesh palata ezasi jéf mérkili (Jeff Merkley), xitay ishliri ijra'iye komitéti re'isi (James P. McGovern) Qatarliqlar imza qoyghan bolup, xelq'ara pul-mu'amile shirketlirini Uyghur rayonidiki mejburiy emgek, yer sétiwélish, milliy kemsitish, muhit we medeniyet buzghunchiliqigha chétishliq shirketlerge yardem qilishni toxtitshqa chaqirghan.

Bu xette amérika dölet mejlisi xitay ishliri ijra'iye komitétining xitayning jinayitige a'it höjjetliri tilgha élin'ghandin kéyin mundaq déyilgen: “2018-Yildin buyan Uyghur aptonom rayonida qurulghan chong lagérlarning mejburiy emgekke chétishliq ikenliki heqqide köplep xewerler bérildi, chünki yerlik hökümet burun tutulghan, kéyin tutulghanlarning hemmisini qul qilip ishletken. Bezilirini Uyghur rayonidin sirtqa yötkep ishletken hemde buni ‛namratliqni yölesh‚ dep atighan. Uyghurlar we bashqa türkiy musulmanlarni qul qilip ishletken zawutlar hetta lagérlaning ichige, türmilerning yénigha sélin'ghan”.

Bu xette xelq'ara pul-mu'amile shirketlirining Uyghur aptonom rayonidiki kishilik hoquq depsendichlikige chétishliq shirketlerge az dégende 486 milyon dollar pul teminligenliki, amérika hökümiti we xelq'ara teshkilatlar Uyghur rayonidiki qebih zorawanliqni irqiy qirghinchiliq, insaniyetke qarshi jinayet dep békitken turuqluq, xelq'ara pul-mu'amile shirketlirining buninggha emel qilmighanliqi, hetta özlirining kespiy ölchimige ri'aye qilmighanliqi otturigha qoyulghan. Andin xelq'ara pul-mu'amile shirketlirining soda exlaq ölchimige ri'aye qilip, Uyghur rayonidiki kishilik hoquq jinayitige shérik boluwatqan shirketlerge qerz bermeslikini telep qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet