Дуня банкисиниң уйғур дияридики “кәспий тәрбийәләш маарипи” ға бәргән қәрзигә чүшәнчә бериши тәләп қилинди

Америка дөләт мәҗлисиниң икки нопузлуқ әзаси дуня банкисиниң мудири дәйвид малпасқа қайта мәктуп йезип, дуня банкисиниң уйғур дияридики “кәспий тәрбийәләш маарипи” ға бәргән қәрз пули һәққидә қошумчә учур билән тәминләшни тәләп қилған.

Мәктубта “биз дуня банкисиниң райондики уйғур, қазақ вә башқа мусулманларниң кәң көләмлик тутқун қилинғанлиқи мәлум болғандин кейинму шинҗаң уйғур аптоном районлуқ маарип назаритигә изчил қәрз пул тарқитишни давамлаштурғанлиқидин җиддий әндишә қиливатимиз,” дейилгән. Мәктубни америка деләт мәҗлиси хитай ишлири комитетиниң қош рәислиридин авам палата әзаси җеймис мәкговерн билән кеңәш палата әзаси марко рубийо язған.

Өткән йили дуня банкисиниң уйғур дияридики 5 мәктәпниң “теника вә кәспий маарип” тәрбийәләш программисиға 50 милйон доллар қәрз пул бәргәнлики ашкарлинип, қаттиқ ғулғула қозғиған иди. Җеймис мәкговерн билән марко рубийо өткән йили 8-айда дуня банкисиға язған мәктубида, уларниң буниңға чүшәнчә беришини тәләп қилған иди. Улар бу қетимқи мәктубида бу мәктәпләрниң қәрз пулға аманлиқ әслиһәлирини сетивалғанлиқи ашкарланғандин кейин дуня банкисиниң қандақ тәдбир яки инкасларда болғанлиқини сориған.

Дуня банкиси өткән йили 11-айда мәзкур түргә қәрз беришни ахирлаштурғанлиқини елан қилған иди. Лекин уларниң тәкитлишичә, дуня банкиси пәқәт мушу түргә қәрз беришни тохтатқан, әмма башқа түрләргә қәрз беришни давамлаштуруп кәлгән. Улар мәктубида дуня банкисиниң бу 5 мәктәпкә давамлиқ қәрз беришниң йошурун хәвпини тәкшүрүп бақмиғанлиқиниң соал пәйда қилғанлиқини оттуриға қойған. Мәктубта йәнә шинҗаң уйғур аптоном районидәк бир җайда хитайниң дуня банкисиниң өлчәмлиригә әмәл қиливатқанлиқиға қандақ капаләтлик қилидиғанлиқи соралған.