Dunya bankisining Uyghur diyaridiki “Kespiy terbiyelesh ma'aripi” gha bergen qerzige chüshenche bérishi telep qilindi

• Muxbirimiz erkin
  2020-08-14

Amérika dölet mejlisining ikki nopuzluq ezasi dunya bankisining mudiri deywid malpasqa qayta mektup yézip, dunya bankisining Uyghur diyaridiki “Kespiy terbiyelesh ma'aripi” gha bergen qerz puli heqqide qoshumche uchur bilen teminleshni telep qilghan.

Mektubta “Biz dunya bankisining rayondiki Uyghur, qazaq we bashqa musulmanlarning keng kölemlik tutqun qilin'ghanliqi melum bolghandin kéyinmu shinjang Uyghur aptonom rayonluq ma'arip nazaritige izchil qerz pul tarqitishni dawamlashturghanliqidin jiddiy endishe qiliwatimiz,” déyilgen. Mektubni amérika délet mejlisi xitay ishliri komitétining qosh re'isliridin awam palata ezasi jéymis mekgowérn bilen kéngesh palata ezasi marko rubiyo yazghan.

Ötken yili dunya bankisining Uyghur diyaridiki 5 mektepning “Ténika we kespiy ma'arip” terbiyelesh programmisigha 50 milyon dollar qerz pul bergenliki ashkarlinip, qattiq ghulghula qozghighan idi. Jéymis mekgowérn bilen marko rubiyo ötken yili 8-ayda dunya bankisigha yazghan mektubida, ularning buninggha chüshenche bérishini telep qilghan idi. Ular bu qétimqi mektubida bu mekteplerning qerz pulgha amanliq eslihelirini sétiwalghanliqi ashkarlan'ghandin kéyin dunya bankisining qandaq tedbir yaki inkaslarda bolghanliqini sorighan.

Dunya bankisi ötken yili 11-ayda mezkur türge qerz bérishni axirlashturghanliqini élan qilghan idi. Lékin ularning tekitlishiche, dunya bankisi peqet mushu türge qerz bérishni toxtatqan, emma bashqa türlerge qerz bérishni dawamlashturup kelgen. Ular mektubida dunya bankisining bu 5 mektepke dawamliq qerz bérishning yoshurun xewpini tekshürüp baqmighanliqining so'al peyda qilghanliqini otturigha qoyghan. Mektubta yene shinjang Uyghur aptonom rayonidek bir jayda xitayning dunya bankisining ölchemlirige emel qiliwatqanliqigha qandaq kapaletlik qilidighanliqi soralghan.