Dunya bankisi Uyghur aptonom rayonidiki "Kespiy terbiyelesh programmisi" gha qerz bérishni toxtatti

Muxbirimiz erkin
2019-11-11
Élxet
Pikir
Share
Print

Dunya bankisi 11‏-noyabir küni bayanat élan qilip, özlirining Uyghur aptonom rayonidiki "Kespiy terbiyelesh programmisi" bériwatqan qerzni toxtatqanliqini élan qildi.

Yéqinda dunya bankisining xitay bilen kélishim tüzüp, 2015‏-yildin béri Uyghur aptonom rayonidiki "Xoten Uyghur tébabetchilik aliy téxnikomi", "Shinjang yéza igilik mashinisazliq instituti" qatarliq 5 mektepning "Kespiy terbiyelesh programmisi" gha 50 milyon dollar qerz bérip kéliwatqanliqi ashkarilinip, zor ghulghula qozghighan.

Amérikadiki "Tashqi siyaset" zhurnilida élan qilin'ghan bu heqtiki bir maqalide, bir mektepning bu pulgha "Tikenlik sim, yash aqquzush bombisi étish eswabi we qoghdinish saymanliri" ni sétiwalghanliqi ilgiri sürülgen.

Dunya bankisi düshenbe küni élan qilghan bayanatida, "Mezkur programmigha alaqidar mekteplerning tarqaqliqi, ularni nazaret qilishning müshküllüki nezerde tutulup, mezkur programmining kölimi we da'irisi kichiklitildi. Bolupmu programmining shinjangdiki mekteplerge chétishliq hemkarliq türige xatime bérildi" déyilgen.

Mezkur programmining xitay hökümiti 2 milyondek Uyghur we bashqilarni lagérlargha qamap, ularning zor bir qismini paxta-toqumuchiliq karxanilirida mejburiy emgekke séliwatqan, uning bu heriketni "Kespiy terbiyelesh" namida élip bériwatqan bir waqitta ashkarilinishi amérika dölet mejlisi, kishilik hoquq teshkilatliri we chet'eldiki Uyghurlarning qattiq qarshiliqigha uchrighan.

Dunya bankisining bayanatchisi ötken ayda radiyomizgha bergen bayanatida, dunya bankisining qerz pulning qandaq orunlargha ishlitilgenlikige qarita tekshürüsh élip baridighanliqini bildürgenidi. Lékin, firansiye agéntliqining 11‏-noyabir küni xewer qilishiche, dunya bankisi özlirining tekshürüsh élip bérish arqiliq Uyghur aptonom rayonidiki yuqiriqi 5 mektepke bérilgen qerz pulning "Namuwapiq orun'gha ishlitilgenlikige da'ir delil tapalmighanliqi" ni bildürgen.

Toluq bet