Xitay dunya sehiye teshkilatining korona wirusining menbesini tekshürüsh telipini ret qilghan

Xitay hökümiti dunya sehiye teshkilatining wuxende partlighan korona wirusi yuqumining menbesini tekshürüsh telipini ret qilghan. Dunya sehiye teshkilatining bildürüshiche, nöwette xitay mezkur wirusning kélip chiqish menbesini özi tekshürüshke bashlighan bolsimu, lékin u dunya sehiye teshkilatining tekshürüshke qatnishishini tosqan. Korona wirusi ötken yili 12-ayda bayqalghan bolsimu, lékin u yuqumni bir mezgil yoshurup, uning dunyawi yuqumgha aylinishini keltürüp chiqarghanliqi bildürülmekte.

Xitayning herikiti wirusning menbesige da'ir her xil gumanlarni peyda qilghanidi. Dunya sehiye teshkilatining xitayda turushluq wekili gawdén galéning “Asman xewerliri” (Sky News) agéntliqigha bildürüshiche, dunya sehiye teshkilati tekshürüshke qatnishishni qayta-qayta telep qilghan bolsimu, lékin buning héchqandaq paydisi bolmighan. U؛ “Biz döletning tekshürüsh élip bériliwatqanliqini bilimiz. Lékin hazirqi basquchta uninggha qatnishishqa teklip qilinmiduq” dégen.

Uning tekitlishiche, buningda wirusning kélip chiqish menbesi shundaqla haywanlar bilen ademlerning uchrishishi intayin muhim bolup, uni tetqiq qilish zörür iken. Xitayning dunya sehiye teshkilatining tekshürüshke qatnishishini ret qilish sewebi melum bolmisimu, lékin bu wirusning tarqilish menbesige bolghan gumanlarni téximu kücheytmekte. Gawdén galé xitayning dunya sehiye teshkilatini tekshürüshke qatnashturmasliqigha birer orunluq sewebi bar-yoqluqi heqqidiki so'algha “Bizning nezirimizde orunluq seweb yoq” dégen.