Президент трамп американиң дуня сәһийә тәшкилатидин чекинип чиққанлиқини елан қилди
2020.05.29
Америка президенти доналд трумп 29-май күни ақсарайда ахбарат йиғини өткүзүп, американиң дуня сәһийә тәшкилатидин чекинип чиққанлиқини җакарлиди. Трамп йәнә хитай һөкүмитиниң хоңкоңниң алаһидә имтиязлиқ орнини бикар қилғанлиқиға инкас қайтурди.
Президент трампниң тәкитлишичә, униң һөкүмити йәнә хоңкоңда демократийиниң бузғунчлиққа учрушида җавабкарлиқи бар хитай әмәлдарлириға ембарго йүргүзидикән. У: “биз бүгүн дуня сәһийә тәшкилати билән болған мунасиветимизни ахирлаштуримиз. Униңға берип кәлгән мәбләғни дунядики башқа аммиви сәһийә сахавәт органлириға беримиз,” дегән.
Президент трамп өткән айда дуня сәһийә тәшкилатиниң рәһбәрлиригә бир айлиқ мөһләт берип, әгәр җиддий ислаһат елип бармиса униңға пул беришни мәңгүлүк тохтитидиғанлиқини билдүргән иди. Президент трамп баянатида дуняниң хитайниң натоғра истили сәвәблик азаб-оқубәт чекиватқанлиқини тәкитләп: хитай 100 миңдин артуқ америкалиқ һаятидин айрилған дуняви юқумни кәлтүрүп чиқарди,” дегән.
У йәнә хитайниң хоңкоңға мунасивәтлик “дөләт хәвпсизлики қануни” ниң бир “трагедийә” икәнликини, американиң хоңкоңниң алаһидә орнини тониған сода вә саяһәт җәһәтләрдики имтиязини бикар қилғанлиқини тәкитлигән. У: “хитай ‛бир дөләттә икки хил түзүм‚ ниң орниға ‛бир дөләттә бир хил түзүм” ни дәссәтти. Бу хоңкоң үчүн бир трагедийә,” дәп көрсәткән. Униң тәкитлишичә, америка йәнә өзиниң дөләт хәвпсизликигә нисбәтән “йошурун хәвпи мәвҗут,” дәп қаралған хитай пуқралириниң америкиға киришигә чәк қойидикән.