Prézidént tramp amérikaning dunya sehiye teshkilatidin chékinip chiqqanliqini élan qildi

Muxbirimiz erkin
2020-05-29
Share

Amérika prézidénti donald trump 29-may küni aqsarayda axbarat yighini ötküzüp, amérikaning dunya sehiye teshkilatidin chékinip chiqqanliqini jakarlidi. Tramp yene xitay hökümitining xongkongning alahide imtiyazliq ornini bikar qilghanliqigha inkas qayturdi.

Prézidént trampning tekitlishiche, uning hökümiti yene xongkongda démokratiyining buzghunchliqqa uchrushida jawabkarliqi bar xitay emeldarlirigha émbargo yürgüzidiken. U: "Biz bügün dunya sehiye teshkilati bilen bolghan munasiwétimizni axirlashturimiz. Uninggha bérip kelgen mebleghni dunyadiki bashqa ammiwi sehiye saxawet organlirigha bérimiz," dégen.

Prézidént tramp ötken ayda dunya sehiye teshkilatining rehberlirige bir ayliq möhlet bérip, eger jiddiy islahat élip barmisa uninggha pul bérishni menggülük toxtitidighanliqini bildürgen idi. Prézidént tramp bayanatida dunyaning xitayning natoghra istili seweblik azab-oqubet chékiwatqanliqini tekitlep: xitay 100 mingdin artuq amérikaliq hayatidin ayrilghan dunyawi yuqumni keltürüp chiqardi," dégen.

U yene xitayning xongkonggha munasiwetlik "Dölet xewpsizliki qanuni" ning bir "Tragédiye" ikenlikini, amérikaning xongkongning alahide ornini tonighan soda we sayahet jehetlerdiki imtiyazini bikar qilghanliqini tekitligen. U: "Xitay 'bir dölette ikki xil tüzüm' ning ornigha 'bir dölette bir xil tüzüm" ni dessetti. Bu xongkong üchün bir tragédiye," dep körsetken. Uning tekitlishiche, amérika yene özining dölet xewpsizlikige nisbeten "Yoshurun xewpi mewjut," dep qaralghan xitay puqralirining amérikigha kirishige chek qoyidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet