Dunya Uyghur qurultiyi amérika, en'gliye, kanadaning Uyghur mejburiy emgikini cheklesh tedbirlirini qarshi aldi

• Muxbirimiz erkin
  2021-01-15

Dunya Uyghur qurultiyi bayanat élan qilip, amérika, en'gliye, kanada hökümetlirining Uyghurlar uchrawatqan éghir kishilik hoquq depsendichilikige qarshi yéngi tedbirlerni alghanliqi, bolupmu gherb shirketlirining Uyghur mejburi emgikige ishtirak qilishni chekligenlikini qarshi alidighanliqini bildürdi. Mezkur teshkilatning 14-yanwar élan qilghan yazma bayanatida tekitlinshiche, “Amérika, en'giliye, kanadaning alghan yéngi tedbirliri xelq'ara jemiyetning xitay kompartiyesi bilen emdi normal alaqe qilishining mümkin emeslikini étirap qilghanliqini körsitidiken”.

13-Yanwar amérika tamozhna-chégra qoghdash idarisi Uyghur élide ishlepchiqirilghan paxta, pemidur mehsulatlirini chekligen. Buningdin bir kün awwal en'gliye tashqi ishlar ministiri dominik rab hökümetning yéngi belgilime chiqirip, en'gliye shirketlirining import mehsulatlirigha Uyghur mejburiy emgikining arilashmighanliqini ispatlishini telep qilidighanliqini élan qilghan. Oxshash bir künde kanada tashqi ishlar ministiri franshis filip shampeyinmu kanadaning oxshash tedbir qollinip, Uyghur mejburiy emgek mehsulatlirining kanada bazirigha kirishi, kanada shirketlirining mejburi emgekke ishtirak qilishini chekleydighanliqini jakarlighanidi.

Dunya Uyghur qurultiyi bayanatida bu tedbirlerni qarshi alsimu, biraq Uyghurlargha qarshi ishliniwatqan jinayetke xatime bérish üchün téximu keskin tedbirlerni élishqa toghra kélidighanliqini bildürgen. Bayanatta mundaq déyilgen: “Halbuki, xitay hökümiti yüz minglighan Uyghurni mejburi emgek we bashqa éghir kishilik hoquq depsendichiliklirige duchar qilishni dawamlashturghanche, bu jinayetke xatime bérish üchün teximu köp tedbirlerni élishqa toghra kélidu”. Bayanatta tekitlinishiche, yawropa ittipaqi xitay bilen hasil qilghan meblegh sélish kélishimini kishilik hoquqqa baghlishi kérek iken.