Xitayning "Yershari waqti géziti" dunya Uyghur qurultiyini qarilashqa urundi

Muxbirimiz irade
2020-03-18
Élxet
Pikir
Share
Print

Xitayning "Yershari waqti géziti" yéqinda dunya Uyghur qurultiyigha hujum qilidighan bir parche maqale élan qilip, Uyghur rayonida yüz bériwatqan éghir kishilik hoquq paji'elirini inkar qilishqa urundi.

"Yershari waqti géziti" 15-mart künidiki maqaliside "Grayzone" namliq tor bette ajit six namliq shexs teripidin dunya Uyghur qurultiyi heqqide yézilghan bir parche maqalini neqil élip turup, amérikadiki "Démokratiyeni ilgiri sürüsh fondi" ning maliye yardimige érishidighan dunya Uyghur qurultiyining amérikaning dölet istixbarat idarisi "CIA" ning bashqurushi astidiki organliqini, uning amérikaning buyruqigha bina'en xitaygha qara chaplash heriketlirini yürgüzüp, Uyghur élide lagérlar we bashqa zulum siyasetliri yürgüzülüwatqanliqi heqqide yalghan teshwiqat bilen shughullan'ghanliqini ilgiri sürgen. Ular maqaliside, jéngliyang isimlik bir xitay tetqiqatchining sözlirini neqil keltürüp turup, amérika dunya Uyghur qurultiyini qollinip turup, xitayni qamal astigha élish meqsitige yetmekchi boluwatidu, dégen.

Xitayning hökümet awazi bolghan "Yershari waqti géziti" yene, erkin asiya radiyosinimu dunya Uyghur qurultiyigha munasiwetlik organ, dep körsitip, nyu-york waqti géziti qatarliq bashqa xelq'araliq axbaratlarda lagérlar heqqide chiqqan xewerlernimu erkin asiya radiyosi teminligenlikini bildürgen we bu arqiliq yuqiridiki axbaratlarda élan qilin'ghan pakitlik xewerlerni yoqqa chiqirishqa urun'ghan.

Yuqiridiki xitay teshwiqat apparati yene, "Dunya Uyghur qurultiyining térrorluq teshkilatlar bilen alaqisi barliqi" ni ilgiri sürüsh bilen teng, Uyghur élide barliq milletlerning xushal-xuram yashawatqanliqini, xitayning milletler siyasitining intayin ilgharliqini ilgiri sürgen.

Xitay hökümitining Uyghur élide lagér tüzümi we shundaqla mejburiy emgek tüzümini yolgha qoyuwatqanliqi heqqide yéqindin buyan xelq'aradiki musteqil tetqiqat organliri muhim doklatlarni élan qilghandin kéyin xitay hökümiti xelq'arada küchlük bésimgha duch kelgenidi. Dunya Uyghur qurultiyi tiwittir arqiliq "Yershari waqti" gézitige qayturghan inkasida "Xitay hökümiti rayondiki insaniyetke qarshi yürgüzüwatqan jinayetlirini toxtitish ornigha dunya Uyghur qurultiyigha hujum qilmaqta. Insanlarning hayati bedilige özining abruyini qoghdashqa urunmaqta" dédi.

Toluq bet