Дуня уйғур қурултийи американиң германийәдики баш әлчиси әйми гатмәнгә рәһмәт ейтти

Вашингтондин мухбиримиз уйғар тәйярлиди
2024.03.20

Хитай һөкүмитиниң уйғур елидә мусулманларниң рамизан ейини тәбриклиши, роза тутуп, диний паалийәтләр билән шуғуллинишини чәкләватқанлиқи тәнқидкә учраватқанда американиң берлиндики баш әлчиси мусулманларниң рамизанни тәбрикләп паалийәт өткүзүп, бу мурасимға уйғурларниму тәклип қилған.

Дуня уйғур қурултийиниң X рәсмий һесабидин елан қилған хәвиригә асасланғанда, дуня уйғур қурултийи американиң германийәдики баш әлчиси әйми гатмән (Amy Gutmann) ниң 3-айниң 13-күни униң туралғусидики рамизанни күтүвелиш мурасимиға уйғур вәкиллирини тәклип қилғанлиқи вә уйғур мусулманлириниң қийинчилиқиға диққәт қилғанлиқи үчүн рәһмәт ейтқан.

Дуня уйғур қурултийиниң билдүрүшичә, америка баш әлчисиниң уйғурларниңму рамизанини тәбрикләп мәзкур мәхсус иптарға уйғур вәкиллирини тәклип қилғанлиқидин ғурур һес қилғанлиқини һәм рәһмитини изһар қилған.

Лекин дуня уйғур қурултийи рамизан келиш билән тәң баянат елан қилип, пүткүл мусулманлар, болупму уйғурларниң рамизанни тәбрикләш билән биргә хитай һөкүмитиниң уйғур елидә уйғур вә башқа мусулманларниң роза тутуш, диний мурасимларни өткүзүш қатарлиқ етиқад әркинликлирини давамлиқ чәклигәнликини әйиблигәниди.

Иҗтимаий таратқулардин мәлум болушичә, уйғур елидә рамизан мәзгилидә йемәк-ичмәк базарлири вә той-төкүн сорунлири нормалдикидәк қайнақ һаләттә давам қилмақта. Уйғур елидики уйғурчә вә хитайчә дөләт рәсмий ахбарат васитилири вә иҗтимаий таратқулардиму рамизан һәққидә һечқандақ хәвәр йоқлуқи билинмәктә. Уйғур аптоном райони яки бейҗиң мәркизий һөкүмити рәһбәрлири хитайдики уйғур, туңган вә башқа мусулманларниң рамизанини тәбрикләйдиған бирәр тәбрикнамә елан қилип бақмиған.

Радийомиз уйғур елидики қанун саһәсидә, рамизан мәзгилидә көзитиш вә назарәтни күчәйтиш һәққидә мәхпий уқтуруш чүшкәнлики вә бу уқтурушниң нәтиҗисидә роза тутушниң илгирики йиллардикидәк чәклимигә учриғанлиқини дәлиллигәниди.

Хитай даирилири хәлқара сәһниләрдә “бәхтлик мусулманлар” дәп тәшвиқ қиливатқан уйғурлар яшайдиған районлардики мәсчитләрниң рамизан мәзгилидиму тақақлиқ вә диний затларниң қамақта икәнлики билинмәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.