Dunya Uyghur qurultiyi amérikaning gérmaniyediki bash elchisi eymi gatmen'ge rehmet éytti

Washin'gtondin muxbirimiz uyghar teyyarlidi
2024.03.20

Xitay hökümitining Uyghur élide musulmanlarning ramizan éyini tebriklishi, roza tutup, diniy pa'aliyetler bilen shughullinishini cheklewatqanliqi tenqidke uchrawatqanda amérikaning bérlindiki bash elchisi musulmanlarning ramizanni tebriklep pa'aliyet ötküzüp, bu murasimgha Uyghurlarnimu teklip qilghan.

Dunya Uyghur qurultiyining X resmiy hésabidin élan qilghan xewirige asaslan'ghanda, dunya Uyghur qurultiyi amérikaning gérmaniyediki bash elchisi eymi gatmen (Amy Gutmann) ning 3-ayning 13-küni uning turalghusidiki ramizanni kütüwélish murasimigha Uyghur wekillirini teklip qilghanliqi we Uyghur musulmanlirining qiyinchiliqigha diqqet qilghanliqi üchün rehmet éytqan.

Dunya Uyghur qurultiyining bildürüshiche, amérika bash elchisining Uyghurlarningmu ramizanini tebriklep mezkur mexsus iptargha Uyghur wekillirini teklip qilghanliqidin ghurur hés qilghanliqini hem rehmitini izhar qilghan.

Lékin dunya Uyghur qurultiyi ramizan kélish bilen teng bayanat élan qilip, pütkül musulmanlar, bolupmu Uyghurlarning ramizanni tebriklesh bilen birge xitay hökümitining Uyghur élide Uyghur we bashqa musulmanlarning roza tutush, diniy murasimlarni ötküzüsh qatarliq étiqad erkinliklirini dawamliq chekligenlikini eyibligenidi.

Ijtima'iy taratqulardin melum bolushiche, Uyghur élide ramizan mezgilide yémek-ichmek bazarliri we toy-tökün sorunliri normaldikidek qaynaq halette dawam qilmaqta. Uyghur élidiki Uyghurche we xitayche dölet resmiy axbarat wasitiliri we ijtima'iy taratqulardimu ramizan heqqide héchqandaq xewer yoqluqi bilinmekte. Uyghur aptonom rayoni yaki béyjing merkiziy hökümiti rehberliri xitaydiki Uyghur, tunggan we bashqa musulmanlarning ramizanini tebrikleydighan birer tebrikname élan qilip baqmighan.

Radiyomiz Uyghur élidiki qanun saheside, ramizan mezgilide közitish we nazaretni kücheytish heqqide mexpiy uqturush chüshkenliki we bu uqturushning netijiside roza tutushning ilgiriki yillardikidek cheklimige uchrighanliqini delilligenidi.

Xitay da'iriliri xelq'ara sehnilerde “Bextlik musulmanlar” dep teshwiq qiliwatqan Uyghurlar yashaydighan rayonlardiki meschitlerning ramizan mezgilidimu taqaqliq we diniy zatlarning qamaqta ikenliki bilinmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.