Dunya Uyghur qurultiyi argéntina jinayi ishlar fédératsiye aliy sotigha naraziliq erzi sundi

Dunya Uyghur qurultiyi argéntina jinayi ishlar fédératsiye aliy sotigha naraziliq erzi sunup, Uyghurlargha qaritiliwatqan insaniyetke qarshi jinayet üstidin dawa échishni telep qildi.

Bu naraziliq erzi, bu'énus-ayréstiki jinayi ishlar soti jinayi ishlar fédératsiye aliy sotining Uyghurlarning irqiy qirghinchiliq we insaniyetke qarshi jinayetke uchrash mesilisi boyiche dawa échish heqqidiki buyruqini ijra qilmighandin kéyin sunulghan.

2022-Yili 8-ayning 17-küni, en'gliye xelq'ara qanun adwokati maykol polek qatarliqlar dunya Uyghur qurultiyi we Uyghur kishilik hoquq qurulushigha wakaliten, argéntina jinayi ishlar sotigha xitayning irqiy qirghinchiliq jinayiti üstidin erz sun'ghan idi. Biraq aridin bir yil ötkende, argéntina jinayi ishlar sotining teptish emeldari bu dawagha qarimasliq heqqide qarar chiqarghan. Argéntina jinayi ishlar fédératsiye aliy soti 2024-yili 11-iyul küni qarar chiqirip, bu'énus-ayréstiki bu jinayi ishlar sot mehkimisining Uyghur irqiy qirghinchiliqi délosi üstidin sot achmasliq qararini aghdurup tashlighan, shundaqla teptish da'irilirining derhal tekshürüsh bashlishini buyrughan idi.

Dunya Uyghur qurultiyining körsitishiche, argéntina jinayi ishlar soti bu buyruqqa emel qilmighan.

Dunya Uyghur qurultiyining bu heqtiki mexsus bayanatida körsitilishiche, adowkat maykil polek bu'énus-ayréstiki bu jinayi ishlar sotining herikitidin qattiq epsuslan'ghanliqini bildürgen. U, “Bu délo argéntina qanun sistémisining obyéktipliqi we uning argéntina asasiy qanunini qollinishtiki terepsizlikige munasiwetlik bir qétimliq sinaq” dep körsetken.

U bayanattiki sözide mundaq dégen: “Biz sotning adil qarar chiqirish mejburiyitini ada qilip, bu délo arqiliq zor we küchlük döletlerning qorqutush wasitisi arqiliq jazadin qéchip qutulalmaydighanliqini körsitip bérishini ümid qilimiz.”

Argéntina jinayi ishlar sotining irqiy qirghinchiliq jinayiti, insaniyetke qarshi jinayet we dunyaning her qandaq yéridiki adem qiynash jinayetliridin hésab sorash hoquqi bar bolup, sotqa sunulghan erznamide xitayning Uyghurlar we bashqa türkiy xelqlerge irqiy qirghinchiliq we insaniyetke qarshi jinayettin ibaret xelq'araliq jinayetlerning jawabkari ikenliki ilgiri sürülgen.

Bu naraziliq erzi 6-noyabir küni dunya Uyghur qurultiyining sabiq re'isi dolqun eysa, Uyghur kishilik hoquq qurulushining diréktori ömer qanat we xelq'ara qanun adwokati maykol polek teripidin argéntina jinayi ishlar sotigha sunulghan.