Dunya Uyghur qurultiyi en'giliye sotigha sun'ghan erzide ghelibe qildi

6-Ayning 27-küni en'giliye aliy sotining Uyghur mejburiy emgikige chétishliq paxta mehsulatlirini import qilishqa cheklime qoymasliq heqqide 2023-yil chiqarghan qarari aghdurup tashlan'ghan. Netijide en'giliye aliy soti üstidin erz sun'ghan “Dunyawi qanun herikiti tori” (GLAN) bilen dunya Uyghur qurultiyi ghelibe qilghan.

En'giliye aliy sotining ilgiriki qararida, en'giliye jinayi ishlar idarisi (NCA) Uyghur rayonidiki mejburiy emgekke chétishliq mallarning qanunsiz ikenlikini tekshürüshni ret qilsa bolatti. Bu qétimqi qararda, eger en'giliyediki bir shirket “Jinayetke shérik” halda ishlepchiqirilghan bir malni import qilghan bolsa, mesilen, bu mal Uyghurlarni qul qilish bedilige ishlepchiqirilghan bolsa, mezkur shirket soda jinayiti ötküzgenliki bilen eyiblinidiken.

Dunya Uyghur qurultiyi bu munasiwet bilen 27-iyun küni élan qilghan bayanatida mundaq dégen: “Bu, dunyada tunji qétim sherqiy türkistandiki Uyghur we bashqa türkiy milletlerge yürgüzülüwatqan irqiy qirghinchiliq jinayitige shérik bolghan hemde Uyghur mejburiy emgikige chétishliq bolghan teminlesh zenjirini buzushqa munasiwetlik sot délosidur. Shirketler emdi özining mal teminlesh zenjirini tazilaydu, ya bolmisa erz qilinish xetirige uchraydu”.

“Xitay heqqidiki xelq'ara parlaméntlar birliki” ning ijra'iye diréktori lok pulford özining X hésabida bu ghelibini tebrikligen. U bu heqte toxtilip: “Dunya Uyghur qurultiyi en'giliye jinayi ishlar idarisige qarshi erzide ghelibe qildi. En'giliye Uyghur mejburiy emgiki arqiliq ishlepchiqirilghan paxta mehsulatlirini import qilishning aldini élishta mes'uliyitini ada qilalmidi” dégen.

Ikki yil burun dunya Uyghur qurultiyi en'giliye hökümitining Uyghur rayonidin paxta import qilish mesilisini tekshürmigenlikini bildürüp, en'giliye sotigha erz sun'ghan bolsimu, mezkur sot ötken yili en'giliye hökümitige paydiliq qarar chiqarghanidi. Shuning bilen, dunya Uyghur qurultiyi en'giliye sotining qararigha naraziliq bildürüp qayta erz sun'ghanidi.

2024-Yil 5-ayning 16-küni dunya Uyghur qurultiyi, dunyawi qanun herikiti tori (GLAN), qulluqqa qarshi turush xelq'ara jem'iyiti qatarliqlar en'giliye aliy sotining 2023-yil en'giliye hökümitini yaqlap chiqarghan qararigha naraziliq bildürgenidi.