D u q ning 5 - qurultiyigha qatnishidighan wekiller parizhgha jem boldi

Dunya Uyghur qurultiyining 5 - qétimliq qurultiyigha qatnishidighan wekiller 10 - iyul küni fransiyening parizh shehirige yétip kélip, yighin teyyarliqigha kirishti.

Muxbirimizning parizhdin xewer bérishiche, dunya Uyghur qurultiyining nöwette wezipe ötewatqan barliq rehberliri parizh shehiridiki yighin échilidighan méhmanxanida jem bolup, 11 - iyul küni bashlinidighan qurultayning xizmetliri we bashqa mesililer heqqide pikirleshti.

Dunya Uyghur qurultiyining 5 - qétimliq qurultiyigha qatnishidighan amérika, kanada, yaponiye, yawropa ittipaqi memliketliri, türkiye we ottura asiya jumhuriyetliridin kelgen wekiller parizh shehiridiki “Nowotél” méhmanxanisigha kélip orunliship, tizimgha aldurush, yighin resmiyetlirini béjirish ishlirini élip bardi.

Xewer qilishiche, 11 - iyul küni chüshtin burun 9 yérimdin 12ghiche qurultayning échilish murasimi ötküzülgendin kéyin, bashqa barliq yighinlar nowotél méhmanxanisida 13 - iyulghiche dawamliship, 130 nechche wekilning qatnishishida démokratik saylam ötküzülidiken we dunya Uyghur qurultiyining xizmetliri hem Uyghurlarning nöwettiki weziyitige a'it bir qatar mesililer muhakime qilinidiken.

Qurultaygha yene bir qisim xelqaraliq kishilik hoquq teshkilatlirining wekilliri, mutexessisler we közetküchilermu qatnishidu.