Dunya Uyghur qurultiyining en'gliye sotigha sun'ghan erzi körülüshke bashlighan

Washin'gtondin muxbirimiz irade teyyarlidi
2024.05.16

Ikki yil burun dunya Uyghur qurultiyi en'gliye hökümitining Uyghur rayonidin paxta import qilish mesilisini tekshürmigenlikini bildürüp erz sun'ghan, biraq eyni chaghda en'gliye soti hökümetke paydiliq qarar chiqarghan idi. Buning bilen, dunya Uyghur qurultiyi en'gliye sotining qarari üstidin qayta erz sun'ghan.

16-May küni, dunya Uyghur qurultiyi, yershari qanun heriket tori (GLAN), qulluqqa qarshi turush xelq'ara jem'iyiti qatarliqlar en'gliye yuqiri sotining 2023-yili en'gliye hökümiti üchün chiqarghan qararigha naraziliq bildürgen.

Qulluqqa qarshi turush xelq'ara jem'iyiti “X” te bildürgen inkasida, bu sotni “Dunya miqyasida mejburiy emgekke séliniwatqan milyonlighan kishilerning hayatigha tesir körsitishi mumkin. Biz en'gliyening mejburiy emgekke shérik bolmasliqigha kapaletlik qilishimiz kérek” dégen.

Yuqiridiki organning inkasidin qarighanda, en'gliye soti ilgiriki qararida “Eger import qilghuchi orun mallarni bazar qimmiti boyiche sétiwalghan bolsa, u halda u jinayi ishlar qanuni boyiche jinayet sadir qilghan hésablanmaydu” déyish arqiliq, import qilghuchini mejburiy emgek eyiblishidin qoghdighan iken.

Halbuki, kishilik hoquq organliri bolsa mejburiy emgek bilen yasalghan tawarlarda adil baha bolmaydighanliqini ilgiri sürüp, mejburiy emgek tawarlirigha bazar qimmiti boyiche mu'amile qilishqa bolmaydighanliqi, uning birdek cheklinishi lazimliqini otturigha qoyghan. Ular “En'gliye derhal mejburiy emgek mehsulatlirini chekleydighan tedbirni yolgha qoymisa, amérika we yawropa ittipaqi bazirigha kirelmigen mejburiy emgek mehsulatlirining tökme qilip sétilish ornigha aylinip qalidu” dep agahlandurghan.

Melum bolushiche, bu erz heqqidiki ispat anglash yighini ikki kün dawam qilidiken. Dunya Uyghur qurultiyining en'gliye ishxanisi mudiri rehime mehmut xanim “X” tiki sözide, “Bu dawada yéngip chiqish en'gliyening xitayning Uyghurlargha qaritiwatqan irqiy qirghinchiliqida rol almaydighanliqi heqqide küchlük signal béridu” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.