د ئۇ ق: تايلانتىكى ئۇيغۇر مۇساپىرلىرىنىڭ قوپال مۇئامىلىگە ئۇچرىغانلىقىدىن قاتتىق ئەندىشە قىلىۋاتىمىز

د ئۇ ق جۈمە كۈنى بايانات ئېلان قىلىپ، تايلاند ساقچىلىرىنىڭ تۇتۇپ تۇرۇش مەركىزىدىكى ئۇيغۇرلارغا تۇتقان مۇئامىلىسىدىن قاتتىق ساراسىمغا چۈشكەنلىكىنى بىلدۈردى. د ئۇ ق نىڭ ئىلگىرى سۈرۈشىچە، تايلاند ساقچىلىرى بانكوكتىكى بىر مەركەزدە تۇتۇپ تۇرۇلۇۋاتقان 6 ئۇيغۇر مۇساپىرنى ئۇرغان.

د ئۇ ق باياناتىدا يەنە، تايلاند دائىرىلىرىنىڭ ئۇ كىشىلەرنىڭ يارىسىنى داۋالاشقا يول قويمىغانلىقىدىن قاتتىق ئەندىشە قىلىۋاتقانلىقىنى بىلدۈردى.

د ئۇ ق نىڭ قەيت قىلىشىچە، ئۆمەر ئوسمان، مۇھەممەت يۈسۈپ، ئالى مۇھەممەت، ئابلىكىم، ئابدۇلئەزىز ۋە ياسىن ئىسىملىك 6 نەپەر ئۇيغۇر بانكوكتىكى بىر تۇتۇپ تۇتۇش مەركىزىگە باشقا دۆلەتلەردىن كەلگەن مۇساپىرلار بىلەن بىللە سولاپ قويۇلغان.

29 - فېۋرال، ساقچىلارنىڭ ئۇيغۇرلارغا كۆرسىتىپ تۇرۇپ سېرىق كاسېت كۆرىشى ئۇلارنىڭ نارازىلىقىنى قوزغاپ، بۇ ئۇلار بىلەن ساقچىلار ئوتتۇرىسىدا ئىختىلاپ پەيدا قىلغان. نەتىجىدە، ساقچىلار ئۇيغۇر مۇساپىرلارنى ئۇرغان. د ئۇ ق نىڭ قەيت قىلىشىچە، ۋەقەدە بىرىنىڭ ئېغىر، بىرىنىڭ يېنىكرەك 2 ئۇيغۇرنىڭ بېشى يارىلانغان. قالغان 4 ئۇيغۇرنىڭ بەدىنىگە تاياق تەگكەن.

د ئۇ ق تايلاند دائىرىلىرىنىڭ ئۇلارنىڭ داۋالىنىشىغا يول قويمىغانلىقىنى بىلدۈرىدى.

د ئۇ ق نىڭ قەيت قىلىشىچە، ھازىر 50 تىن ئارتۇق ئۇيغۇر تايلاندتىكى ئوخشىمىغان تۇتۇپ تۇرۇش مەركەزلىرىگە قاماپ قويۇلغان. تايلاند ھۆكۈمىتى 2015 - يىلى 8 - ئايدا 109 نەپەر ئۇيغۇر مۇساپىرنى خىتايغا قايتۇرۇپ بېرىپ، د ئۇ ق ۋە خەلقئارا كىشىلىك ھوقۇق تەشكىلاتلىرىنىڭ قاتتىق ئەيىبلىشىگە ئۇچرىغان.

د ئۇ ق باياناتىدا، تايلاندنى خەلقئارا قانۇن ۋە مۇساپىرلار ئەھدىنامىسىگە ئەمەل قىلىپ، ئۇيغۇر مۇساپىرلىرىغا ئادىل مۇئامىلە قىلىشقا، ئۇلارنىڭ ھەق - ھوقۇقىنى قوغداشقا چاقىردى.