Дуня уйғур қурултийи: “волкисваген шәрқий түркистандин чиқип кетиши керәк”

Вашингтондин мухбиримиз уйғар тәйярлиди
2024.02.14

2024-Йили 2-айниң 13-күни, коммунизм қурбанлири хатирә фондиниң алий тәтқиқатчиси доктор адриян зензниң уйғур мәҗбурий әмгики һәққидики йеңи тәтқиқат нәтиҗиси җәймисситон фонди (Jamestown Foundation) торида елан қилинған болуп, униңда германийәниң даңлиқ аптомобил ширкити волкисвагенниң (Volkswagen) уйғур мәҗбурий әмгики билән биваситә четишлиқ икәнлики ашкариланғаниди. Бу тәтқиқат нәтиҗиси елан қилинғандин кейин дуня уйғур қурултийи баянат елан қилип, волкисвагенни шәрқий түркистандин чиқип кетишкә чақирған.

 Баянатта мундақ дейилгән: “волкисваген узундин буян уйғурларниң кишилик һоқуқ дәпсәндичиликигә четишлиқ икәнликини инкар қилди вә мәсулийәттин өзини қачуруп кәлди. Лекин, доктор адриян зенз волкисвагенниң уйғур мәҗбурий әмгики билән четишлиқ икәнликини дәлилләр билән испатлиди. Бу волкисвагенниң шәрқий түркистандин чекиниши үчүн бурулуш нуқтиси болуши керәк”.

Баянатта йәнә мундақ дейилгән: “дуня миқясида етирап қилинған волкисвагенға охшаш ширкәтниң уйғур мәҗбурий әмгикигә четилип қелишини қобул қилғили болмайду. Демократик дөләттә паалийәт елип бериватқан вә тәминләш зәнҗири қануни даирисидә тиҗарәт қилидиған ширкәткә нисбәтән, волкисвагенниң бу һәрикити қобул қилғусиз һәрикәт болупла қалмай, өз нөвитидә йәнә әхлақсизлиқ вә номуссизлиқтур. Волкисвагенниң буниңға җавабкар болидиған вақти кәлди” .

 Бир қанчә йилдин буян, волкисвагенниң уйғур мәҗбурий әмгикигә четишлиқ икәнликигә даир испатлар хәлқара ахбарат васитилиридә ашкариланғаниди. 2022-Йили декабирда әнглийә шефилд һаллам университети (Sheffield Hallam University) тәтқиқат гурупписиму уйғурларға алақидар йәнә бир муһим доклат елан қилған болуп, униңда дунядики аптомобил тәминләш зәнҗириниң уйғур мәҗбурий әмгики билән кәң алақиси барлиқи, аптомобил запчаслириниң һәммисиниң дегүдәк уйғур мәҗбурий әмгикигә четишлиқ икәнлики оттуриға қоюлғаниди.  

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.