Yawropaning téximu ejellik wasite arqiliq xitayni cheklishi teklip qilinmaqta

Muxbirimiz eziz
2021-03-30
Share

Uyghur jem'iyiti duch kéliwatqan zor qirghinchiliq hadisisini pilta qilghan halda xitay bilen gherb dunyasida bir zor qarimu-qarshiliq barghanséri muntizim shekil éliwatqanda bir qisim analizchilar yawropa ittipaqini téximu ejellik bolghan "Uniwérsal meblegh sélish kélishimi" arqiliq xitayni chekleshke dewet qilishqa bashlidi.

"Blumbérg tori" ning 30-marttiki xewiride éytilishiche, nöwette amérika we yawropa ittipaqi xitayni heqler depsendichiliki boyiche tenqidlise, xitay hökümiti "Sen bizning ichki ishlirimizgha arilashma" dep muttehemlik qilmaqta iken. Yene kélip, gherb dunyasi zulumni ijra qilghuchi bir qisim xitay emeldarlirigha émbargo qoysa, xitay hökümiti bu zulumlar heqqide söz qilghan amérika we en'gliyediki shexslerge, hetta alimlargha "Jaza bérish" ke aldirimaqta iken. Analizchi andrés klus mushu ehwalni közde tutup "Emdi 'uniwérsal meblegh sélish kélishimi'ni ijra qilish arqiliq xitayni peskoygha chüshüridighan peyt yétip keldi" deydu.

Melum bolushiche, mezkur kélishimning mezmuni yawropaning xitaygha meblegh sélishi hemde buninggha munasiwetlik bazar we bashqa iqtisadiy hemkarliqqa biwasite chétilidiken. Shundaq bolghanliqi üchün eger yawropa ittipaqi xalisa bu kélishim arqiliq xitay iqtisadigha biwasite tesir körsiteleydiken. Aptor gérmaniye hökümitining izchil xitaygha qattiq mewqede bolalmaywatqanliqini tenqidlep "Hazir bizning duch kelginimiz qandaqtur birer terepke yan bésish emes. Eksiche bu ashkariliq we qanun arqiliq idare qilishqa xiris qiliwatqan mustebitlikke qarshi turush mesilisidur. Yawropaning emdi dawamliq ottura yol tutushigha imkaniyet qalmidi" deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet