” el-jezire “Qanili chet'ellerdiki Uyghur jama'itining xitayning nazariti astida ikenlikini xewer qildi

• Muxbirimiz irade
  2019-11-14

14-Noyabir küni” el-jezire “Xewerliri yawropada yashawatqan Uyghur jama'itining xitay hökümiti teripidin qattiq nazaretke éliniwatqanliqi heqqide bir parche xewer tarqatti.

Xewer norwégiyede yashaydighan Uyghurlarni ziyaret qilish asasida yézilghan bolup, uningda bu Uyghurlarning ötken 8-aydin 10-ayghiche bolghan ariliqta dawamliq halda xitay elchixanisidin aldin awazgha élin'ghan aptomatik télifonlarni tapshurup éliwatqanliqi we buning Uyghur jama'iti arisida wehimige seweb bolghanliqini bayan qilghan.

Xewerde bayan qilinishiche, norwégiyedin sirt yene gollandiye, bélgiye we firansiye qatarliq döletlerde yashawatqan Uyghurlarmu oxshash télifonlarni tapshurup alghan.

Norwégiyediki xitay elchixanisi “El-jezire” ge bu heqte qayturghan inkasida bu téléfonlarning özliri bilen alaqisi yoqluqini, buning tor aldamchiliqigha munasiwetlik weqe ikenlikini éytip “Bundaq téléfonlar hetta bizgimu keldi,” dégen. Emma “El-jezire” qanili öz xewiride meyli bu téléfon heqiqeten xitay hökümiti yaki elchixanilirigha munasiwetlik bolsun-bolmisun, xitay hökümitining chet'ellerde yashaydighan Uyghurlarni yenimu ilgirilep nazaret astigha éliwatqanliqi we türlük wasitiler arqiliq ularning herikitini kontrol astigha élishqa urunuwatqanliqini bayan qilghan.

Amérikadiki nopuzluq tetqiqat organliridin “Gérmaniye marshal fondi jem'iyiti” ning tetqiqatchisi andru smal “El-jezire” ge qilghan sözide “Xitay hökümiti chet'ellerdiki Uyghur jama'itige qaratqan bésimini kücheytiwatidu. Bu heqte xitay elchixanilirigha biwasite chétishliq weqeler bar,” dégen.