Tésla shirkiti xitay hökümiti bilen dawamliq hemkarlishish yoligha mangghan

Washin'gtondin muxbirimiz jewlan teyyarlidi
2024.05.01

Tésla shirkitining bash ijra'iye diréktori élon mask (Elon Musk) 4-ayning 29- we 30-künliri xitaygha soda ziyariti qilip, tésla eqliy iqtidarliq aptomobilining xitayda ishlepchiqirilishi üchün ijazet élish hemde xitayning sün'iy eqil téxnikisi shirketliri bilen kélishim imzalash pa'aliyetliride bolghan. Amérika hökümiti amérika shirketlirini xitay shirketliri bilen yuqiri téxnika saheliride hemkarlashmasliq, xitaygha téxnika ötünüp bermeslikke chaqirip kéliwatqan ehwalda, tésla xojayinining xitay bilen hemkarlishish üchün téximu ilgiriligen qedemlerni bésishi ghulghula qozghighan.

“Nyu-york waqti” gézitining 29-aprél élan qilghan xewiride éytilishiche, tésla shirkitining aptomatik mashina heydesh téxnikisi téslaning nöwette bashqa tokluq aptomobillar bilen bolghan riqabettiki üstünlükini saqlawatqan muhim téxnika bolup, eger tésla shirkiti xitayning tekshürüp nazaret qilish organlirining testiqlishidin ötse, xitay we bashqa döletlerdiki sodisi téximu güllinidiken. Téslaning xojayini élon mask xitaydiki sün'iy eqil téxnikisi shirketliri bilen hemkarlishidighanliqini bildürgen bolup, téslaning meblegh salghuchilirigha medet bérish üchün qilghan sözide, tésla shirkitining peqet aptomobil shirkiti bolupla qalmay, yene sün'iy eqil téxnikisi shirkiti ikenlikini éytqan. Xitaydiki tésla mashiniliri 4 yildin buyan “Beydu” shirkitining yol bashlighuch sistémisini ishlitiwatqan bolup, buningdin kéyinmu bu sistémini ishlitishke mejbur iken.

Xitay mashinisazliq jem'iyiti tésladin bashqa xitayning biyadi we niyo qatarliq besh tok aptomobil shirkitining sanliq melumat bixeterlikini qoghdash téxnikisini testiqlighanliqini jakarlighan. Halbuki, xitayning biyadi we niyo tok aptomobili shirkiti nöwette tésla bilen riqabetlishiwatqan hemde bahasining erzanliqi bilen dunyada köp sétiliwatqan mashinilargha aylan'ghan.

Hazir tésla shirkitining xitaygha yene qaysi téxnikisini ötünüp bérish bedilige aptomatik mashina heydesh sistémisini testiqtin ötküzidighanliqi éniq emes iken. Xitayning téslagha oxshash chet el shirketlirini téxnika ötünüp bérish bedilige qollaydighanliqi we ulargha bazar échip béridighanliqi melum bolsimu, xitay hökümiti buni étirap qilmay kelgen.

“Washin'gton pochtisi” géziti 2023-yil 10-ayda élan qilghan bir xewerde, tésla shirkitining Uyghur mejburiy emgikige chétishliq xitay shirketlirige baghlinishliq ikenliki ilgiri sürülgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.