Elishir ömerning chémpiyon bolushi ashkarilighan heqiqetler

Washin'gtondin muxbirimiz eziz teyyarlidi
2023.08.22

Xitay bashqurushidiki “Shinjang géziti” ning 22-awghusttiki xewiride éytilishiche, mongghuliyening ulanbator shehiride ötküzülgen 2023-yilliq sherqiy asiya yashlar tenheriket musabiqiside emdila 17 yashqa kirgen elishir ömer 200 métirgha yügürüsh musabiqiside chémpiyon bolghan. Xewerde uning chémpiyon bolghandin kéyin xitayning besh yultuzluq qizil bayriqini yépinchaqlap munberge chiqqanliqi uning sherep quchqanliqidinmu bekrek gewdilendürülgen.

Xewerde éytilishiche, 2006-yili bay nahiyeside tughulghan elishirni 2022-yili xitay meshqawulliri “Bayqighan we köngül qoyup terbiyeligen” . Netijide u xitay “Meshqawullarning rehberlikide” tézla Uyghur diyarida ötküzülgen musabiqilerde birnechche qétim rékortni buzup, yéngi netije yaratqan. Uning meshqawulliridin jang yang bu heqte söz qilip: “Bu yil 11-ayda ötküzülidighan memliketlik yashlar musabiqiside uning téximu yaxshi netije qazinishigha ishenchim kamil” dégen.

Uyghur diyaridiki zor tutqunda Uyghurlarning medeniyet, ma'arip we tenterbiye saheside közge körün'gen nurghun serxilliri lagérlargha we türmilerge qamalghan bolup, bu tüpeylidin xitay hökümiti izchil xelq'araning tenqidige uchrap kelgen idi. Xitay hökümiti bu xil tenqidlerni inkar qilish meqsitide bir qisim Uyghur tenterbiye cholpanlirini otturigha chiqirip özlirining obrazini perdazlashqa urun'ghan. Shu qatarda 2022-yili féwralda béyjingdiki qishliq olimpik musabiqiside tenterbiye saheside héchqandaq nam chiqirip baqmighan muz téyilish mahiri dilnigar ilhamjanni birdinla “Olimpik mesh'ilige ot yaqquchi cholpan” qilip kötürüp chiqqan hemde xelq'arada zor ghulghuligha seweb bolghan idi. Emdilikte ularning elishir ömerning yügürüsh türidiki netijisini xitay qizil bayriqi bilen zorlap baghlimaqchi bolushi xitay hökümitining ene shu xil urunushlirining dawami, dep qaralmaqta. Téximu muhimi, bu hal xitay hökümitining bezi tenterbiye türliride yenila Uyghurlargha tayinishqa mejbur ikenlikini, emma “Bir chalmida ikki paxtek” taktikisi boyiche bu halni yene öz nöwitide öz teshwiqatlirigha qoral qiliwatqanliqinimu ashkarilimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.