Уйғур дияридики юқури дәриҗилик икки әмәлдар хизмитидин елип ташланди

“хитай хәвәрлири” торидин мәлум болушичә, қәшқәр вилайәтлик хәлқ қурултийиниң сабиқ муавин мудири, сабиқ шәһәр башлиқи мәмтимин бәкри йеқинда “партийә интизамиға хилаплиқ қилған” дегән әйибнамә билән “қош тәкшүрүш” кә елип кетилгән. Алақида учурларда көрситилишичә, “қош тәкшүрүш” адәттә партийә әзаси болған юқури дәриҗилик әмәлдарларниң қолға елинишидики биринчи қәдәм һесаплинидикән.

Хитай һөкүмитиниң бу һәқтики хәвәрлиридә ейтилишичә, мәмтимин бәкри изчил уйғур дияридики сиясий бастуруш һәркәтлиридә актип хизмәт қилған шәхсләрниң бири икән. У һәтта бирнәччә қетим ашкара мақалә йезип: “бир қисим миллий кадирлар ‛терорлуқ вә ‍әсәбийликкә қарши туруш күриши‚ дә пассиплиқ қилип кәлмәктә. Биз бу хил хаһишни қәтий түзитишимиз лазим” дегән икән. Хитай һөкүмитиниң юқури дәриҗилик уйғур кадирлирини мушу тәриқидә “садақәтсизлик” тә әйиблиши һәққидә сөз болғанда хитай өктичи зиялиси чен покоң “уйғур кадирлар қанчилик җанпидалиқ билән хизмәт қилсиму хитай компартийәсиниң нәзәридә улар мәңгү гуманлиқ. Нур бәкриниң қисмити буниң җанлиқ испати” дегән иди.

11-Авғуст күни хитай дөләтлик интизам тәкшүрүш комитети “шинҗаң ишләпчиқириш-қурулуш биңтуәни” қармиқидики дөләт байлиқини назарәт қилиш комитетиниң муавин мудири ляң доңяниң “еғир интизамсизлиқ қилған” лиқи сәвәбидин ревизийә органлириниң тәкшүрүшигә елип кетилгәнликини елан қилған. Һазирчә униң қандақ җинайити барлиқи техи ениқ әмәс икән.