Uyghur diyaridiki yuquri derijilik ikki emeldar xizmitidin élip tashlandi

Muxbirimiz eziz
2021-08-11
Share

“Xitay xewerliri” toridin melum bolushiche, qeshqer wilayetlik xelq qurultiyining sabiq mu'awin mudiri, sabiq sheher bashliqi memtimin bekri yéqinda “Partiye intizamigha xilapliq qilghan” dégen eyibname bilen “Qosh tekshürüsh” ke élip kétilgen. Alaqida uchurlarda körsitilishiche, “Qosh tekshürüsh” adette partiye ezasi bolghan yuquri derijilik emeldarlarning qolgha élinishidiki birinchi qedem hésaplinidiken.

Xitay hökümitining bu heqtiki xewerliride éytilishiche, memtimin bekri izchil Uyghur diyaridiki siyasiy basturush herketliride aktip xizmet qilghan shexslerning biri iken. U hetta birnechche qétim ashkara maqale yézip: “Bir qisim milliy kadirlar ‛térorluq we ‍esebiylikke qarshi turush kürishi‚ de passipliq qilip kelmekte. Biz bu xil xahishni qet'iy tüzitishimiz lazim” dégen iken. Xitay hökümitining yuquri derijilik Uyghur kadirlirini mushu teriqide “Sadaqetsizlik” te eyiblishi heqqide söz bolghanda xitay öktichi ziyalisi chén pokong “Uyghur kadirlar qanchilik janpidaliq bilen xizmet qilsimu xitay kompartiyesining nezeride ular menggü gumanliq. Nur bekrining qismiti buning janliq ispati” dégen idi.

11-Awghust küni xitay döletlik intizam tekshürüsh komitéti “Shinjang ishlepchiqirish-qurulush bingtu'eni” qarmiqidiki dölet bayliqini nazaret qilish komitétining mu'awin mudiri lyang dongyaning “Éghir intizamsizliq qilghan” liqi sewebidin réwiziye organlirining tekshürüshige élip kétilgenlikini élan qilghan. Hazirche uning qandaq jinayiti barliqi téxi éniq emes iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet