Ürümchide aptonom rayon derijilik tunji kölemleshken emgek küchi mulazimet baziri échilidiken

Muxbirimiz erkin
2020-10-05
Share

Ürümchining tudungxaba rayonida aptonom rayon derijilik tunji kölemleshken emgek küchi mulazimet baziri échilidiken.

"Tengritagh" torining 3-öktebir tarqatqan xewiride qeyt qilinishiche, "Shinjang adem küchi bayliqi mulazimet baghchisi" dep atalghan mezkur emgek küchi bazirini tudungxaba rayonluq adem küchi we ijtima'iy parawanliq idarisi qurghan bolup, shularning bashqurushida bolidiken. Lékin mezkur emgek küchi baziri ürümchi sheherlik we aptonom rayonluq adem küchi we ijtima'iy parawanliq organliriningmu qollishi we yéteklishige érishken iken

Melum bolushiche, emgek küchi baziri öktebirning otturilirida échilidiken. Emgek küchi bazirining Uyghurlarni mejburiy emgekke sélish chong xelq'ara mesilige aylinip, amérika hökümiti Uyghur diyarida ishlepchirilghan mehsulatlarning amérika bazirigha import qilinishini chekligen shundaqla amérika dölet mejlisi qanun chiqirip, mejburiy emgek mehsulatlirini chekleshke kirishken mezgilde échilishi, közetküchilerning diqqitini qozghighan.

Amérika awam palatasi téxi yéqindila "Uyghur mejburiy emgikini cheklesh qanun layihesi" bilen "Uyghur mejburiy emgikini ashkarilash qanun layihesi" ni maqullighan. "Tengritagh" torining xewiride tekitlinishiche, mezkur emgek küchi baziri "Shinjangdiki adem küchige éhtiyajliq bolghan karxana we orunlarni adem küchi mulazimiti bilen teminleydighan kespiy baghche" iken. Xewerde bu baghchining "Téximu chong kölemlik, téximu kespiy adem küchi mulazimiti bilen teminlep, her qaysi kesiplerning tereqqiyatigha 'yéngi qan' yetküzidighanliqi" tekitlen'gen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet