Aliy mekteplerdiki “Emgek” teshwiqati diqqet qozghimaqta

Muxbirimiz eziz
2021-12-22
Share

Xitay hökümiti bashqurushidiki “Xitay xewerliri” torining 22-dékabirdiki xewiride éytilishiche, yéqindin buyan Uyghur diyaridiki herqaysi aliy mekteplerde “Emgek arqiliq güzel kelgüsi berpa qilish” témisidiki teshwiqat bashlan'ghan.

Xewerde éytilishiche, bu qétimliq yürüshlük léksiye sözlesh pa'aliyitide aliy mektepni püttürgen oqughuchilar wekilliridin ekber tursun özining yéqinda shopurluqni öginip yük mashinisigha shopurluq qiliwatqanliqini, shundaqla “Kespiy terbiyelesh” arqiliq baghwenchilik téxnikisini igilep neshpütlük bagh berpa qilip bay bolghanliqini sözligen. U sözide “Shinjangda biz néme xizmet qilishimiz yaki qeyerde xizmet qilishimiz pütünley bizning ixtiyarimizda. Amérika jahan'girlikining ‛shinjangda mejburiy emgek dawam qiliwatidu‚ dégini pütünley yalghan” dégen.

Bu qétimliq léksiye pa'aliyitide söz qilghan Uyghur aliy mektep oqughuchiliri birdek özlirining “Kespiy terbiyelesh” arqiliq türlük maharetlerni igilikenliki, shu arqiliq baqmichilik, baghwenchilik yaki déhqanchiliq dégendek igilik bilen shughulliniwatqanliqini tilgha alghan. Emma özlirining aliy mektepte ögen'gen kesipliri boyiche xizmet qilghanliqi heqqide bir éghizmu söz qilmighan.

Xitay hökümitining bu qétimliq teshwiqatining “Uyghur mejburiy emgikini cheklesh qanun layihesi” ning qanun'gha aylinish harpisida teshkillinishi her sahening diqqitini qozghidi. Bolupmu Uyghur aliy mektep oqughuchilirining yillardin buyan ishsiz yürüwatqanliqi, ishxanilarda ish béjiridighan kespiy xizmetlerning xitay aqqunliridin ashmaydighanliqi, Uyghurlarning paxta térishtek éghir jismaniy emgekke mejbur boluwatqanliqi Uyghur diyarigha barghan köpligen sayahetchilerning bayanlirida köp qétimlap tilgha élin'ghanidi. Emdilikte xitay hökümitining dawamliq halda mejburiy emgek mesilisini inkar qilishi ularning eyni waqitta lagérlarning mewjutluqini inkar qilghinini esletmektiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet