Xitayning amérika bilen bolghan hawa kélimat hemkarliqi “Shinjang imbérgosi” gha bérip taqalghan

Amérika prézidéntining hawa kélimati ishliri alahide wekili jon keriyning ‍ötken hepte xitaygha qilghan ziyaritide, xitay terep amérika bilen bolghan hawa kélimati hemkarliqini amérikaning “Shinjang imbargosi” gha taqiwalghan. Jon keriyning “Nyu-york waqti” gézitige bildürüshiche, u xitay tashqiy ishlar ministiri wang yi bilen sözleshkende, “Hawa kélimatining idé'ologiyelik, bir tereplimilik, gé'o-‍istiratégiyelik qoral, waste yaki kündilik mesile emesliki, uning yer shari xaraktirlik, bir tereplimilik bolmighan xris” ikenlikini éytqan.

Biraq wang yi ikki terepning hemkarliqi amérikaning xitaygha tutqan bashqa jehetlerdiki pozitsiyesige baghliq ikenlikini bildürgen. U amérikaning xitayni “Tehdit we reqip” dep qaraydighan pozitsiyege xatime bérishni, kélimat üzgirishini keng gé'o-siyasiy muhittin “Ayrip qarashqa bolmaydighanliqi” ni éytqan. “Xéll” gézitining körsitishiche, wang yi xitayning “‍Ikki tizimliki” bilen “Üch asasiy sherti” ni otturigha qoyup, eger amérika xitay bilen kélimat ishlirida hemkarlashmaqchi bolsa, buninggha ‍ijabiy jawap bérishini telep qilghan.

Melum bolushiche, xitayning “Üch asasiy sherti” we “Ikki tizimliki” xitayning igilik hoquqi we zimin pütülikige hörmet qilish, jümlidin shinjang, tibet, xongkong we teywen'ge dexliy qilmasliq, imbargo, tamozhna béji, qanuniy höküm chiqirish, téxnologiyeni qamal qilish qatarliq wastilar arqiliq xitayning tereqqiyatigha tosqunliq qilmasliq, xitay puqralirigha qaritilghan wiza cheklimisini bikar qilish, xitayning amérikadiki xadimliri we organlirining herkitini tosmasliq, kishilik hoquq depsendichilikige chétishliq xitay kompartiye emeldarlirigha qartilghan jazani bikar qilish qatarliqlarni öz ichige alghan iken.