Әнәс кәнтәр өлүм тәһдитигә дуч кәлди

Мухбиримиз әзиз
2021.11.24

‍Өткән бирнәччә айдин буян хитай һөкүмитиниң уйғур қирғинчилиқи вә хоңкоң, тибәт қатарлиқ җайлардики зораванлиқлирини ашкара сорунларда көп қетим әйиблигән, шуниңдәк хитай рәиси ши җинпиңни кәскин ибариләр билән тәнқидлигән васкетбол маһири әнәс кәнтәр йеқинда өлүм тәһдитигә дуч кәлгән.

CNBC Хәвәр агентлиқиниң 22-ноябирдики телефон зиярити җәрянида әнәс кәнтәр бу һәқтә мәлумат берип 20-ноябир күни өлүм тәһдити һәққидики учурни тапшурувалғанлиқини, әмма өзиниң бу хилдики қорққақ селишларни көп көргәнликини, шуңа буниңлиқ билән өзиниң адаләтни вә һәққанийәтни һимайә қилиштәк мәвқәсидин ваз кәчмәйдиғанлиқини тәкитлигән.

Зиярәт җәрянида у өзиниң уйғурлар вә хитай рәиси ши җинпиң һәққидики баянатлириниң һечқандақ сиясий “муддиа” ға игә әмәсликини, өзиниң пәқәт бигунаһ һалда қириливатқан, әмма авазиниму чиқиришқа имкани қалмиған бир хәлқ үчүн сөз қилғанлиқини әскәртип “мениң қиливатқанлирим сиясий паалийәт әмәс, бәлки инсанлиқ мәҗбурийитимни ада қилиш” дегән.

Әнәс кәнтәрниң пикричә, өткән бирнәччә йилда америка тәвәсидики қара тәнликләр, асиялиқлар вә латин америкасидин кәлгәнләрни һимайә қилиш һәрикәтлиридә һәммидин бәк сәкрәп кәткән Nike ширкити уйғурлар мәсилисигә кәлгәндә “зувани тутулуп қалған”. Йәнә келип улар уйғурларниң мәҗбурий әмгикигә, шуниңдәк бейҗиң қишлиқ олимпик мусабиқисигә шу қәдәр бағлинип кәткән. Дуняға даңлиқ шунчә көп артислар, тәнһәрикәтчиләр вә башқа чолпанлар уйғурларға охшаш бигунаһ зиянкәшликкә учраватқанларни көрүп туруп пулниң меһридә бу ишларни “көрмәс” болувалған. Шуңа у бундақ аччиқ реаллиқ алдида дадиллиқ билән һәққанийәтни һимайә қилишқа атланғаникән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.