Әнглийәдики уйғурлар хитай әлчиханиси алдида намайиш өткүзүп, хитайниң җаза лагерлириға наразилиқ билдүрди

Мухбиримиз әркин
2019-11-11
Елхәт
Пикир
Share
Принт

Әнглийәдики уйғурлар 11‏-ноябир күни хитайниң лондонда турушлуқ әлчиханисиниң алдида намайиш өткүзүп, хитайниң уйғур районидики җаза лагерлириға наразилиқ билдүргән.

Өткән әсирниң 30-вә40-йиллиридики икки қетимлиқ «шәрқий түркистан җумһурийити» ниң 86 вә 75 йиллиқ хатирә күнидә өткүзүлгән намайишта намайишчилар «уйғурларни қутқузайли», «лагерлар тақалсун», «уйғурларға ярдәм қилайли» дегән лозунка, шоарларни товлап, хитайниң уйғурларни «қайта тәрбийәләш» намида кәң көләмлик йиғивелиш лагерлириға қамишиға наразилиқ билдүргән.

Намайишта әнглийәдики уйғур паалийәтчи рәхимә мәхмут америкадики «брейбарт хәвәрләр» агентлиқиниң зияритини қобул қилип, лагерларда «тән җазаси, ачлиқ, паскиничилиқ, кишиләрни намәлум дориларни истемал қилишқа мәҗбурлаш, аялларни мәҗбурий қисирлаштуруш» ниң омумйүзлүк әһвал икәнлики, лагерда йетип чиққан аялларниң «тутқунларға мәҗбурий намәлум дора истемал қилдуруши сәвәблик яш аялларниң һейиз көрүшиниң тохтиғанлиқи» қәйт қиливатқанлиқини билдүргән.

У «брейбарт» агентлиқиға қилған сөзидә йәнә лагерларда «басқунчилиқниң кәң көләмдә мәвҗут икәнлики, тутқунларниң һәр күни дегүдәк қип-ялиңач тәкшүрүлидиғанлиқи, аялларниң қеп-ялиңач қилинип, (лагер) хадимлириниң алдида турғузуп қоюлидиғанлиқи», бу хорлуқниң «21‏-әсирдики инсанлиққа қарши бир җинайәт» икәнликини тәкитлигән.

Униң илгири сүрүшичә, әнглийә һөкүмити өзиниң кишилик һоқуқ принсипида чиң туруп, хитайниң қилмишиға қарши дәс туруши керәк икән. «Брейбарт» ниң хәвиридә қәйт қилинишичә, намайиштики йәнә бир намайишчи уйғур қизи хитайниң «диний радикалларни қайта тәрбийәләймиз» дегининиң бир баһанә икәнлики, униң һәқиқий мәқситиниң «уйғурларни пүтүн бир милләт сүпитидә йоқитиш» икәнкини илгири сүргән.

Пикирләр (0)
Share
Толуқ бәт