En'gliyediki Uyghurlar xitay elchixanisi aldida namayish ötküzüp, xitayning jaza lagérlirigha naraziliq bildürdi

Muxbirimiz erkin
2019-11-11
Élxet
Pikir
Share
Print

En'gliyediki Uyghurlar 11‏-noyabir küni xitayning londonda turushluq elchixanisining aldida namayish ötküzüp, xitayning Uyghur rayonidiki jaza lagérlirigha naraziliq bildürgen.

Ötken esirning 30-we40-yilliridiki ikki qétimliq "Sherqiy türkistan jumhuriyiti" ning 86 we 75 yilliq xatire künide ötküzülgen namayishta namayishchilar "Uyghurlarni qutquzayli", "Lagérlar taqalsun", "Uyghurlargha yardem qilayli" dégen lozunka, sho'arlarni towlap, xitayning Uyghurlarni "Qayta terbiyelesh" namida keng kölemlik yighiwélish lagérlirigha qamishigha naraziliq bildürgen.

Namayishta en'gliyediki Uyghur pa'aliyetchi rexime mexmut amérikadiki "Bréybart xewerler" agéntliqining ziyaritini qobul qilip, lagérlarda "Ten jazasi, achliq, paskinichiliq, kishilerni namelum dorilarni istémal qilishqa mejburlash, ayallarni mejburiy qisirlashturush" ning omumyüzlük ehwal ikenliki, lagérda yétip chiqqan ayallarning "Tutqunlargha mejburiy namelum dora istémal qildurushi seweblik yash ayallarning héyiz körüshining toxtighanliqi" qeyt qiliwatqanliqini bildürgen.

U "Bréybart" agéntliqigha qilghan sözide yene lagérlarda "Basqunchiliqning keng kölemde mewjut ikenliki, tutqunlarning her küni dégüdek qip-yalingach tekshürülidighanliqi, ayallarning qép-yalingach qilinip, (lagér) xadimlirining aldida turghuzup qoyulidighanliqi", bu xorluqning "21‏-Esirdiki insanliqqa qarshi bir jinayet" ikenlikini tekitligen.

Uning ilgiri sürüshiche, en'gliye hökümiti özining kishilik hoquq prinsipida ching turup, xitayning qilmishigha qarshi des turushi kérek iken. "Bréybart" ning xewiride qeyt qilinishiche, namayishtiki yene bir namayishchi Uyghur qizi xitayning "Diniy radikallarni qayta terbiyeleymiz" déginining bir bahane ikenliki, uning heqiqiy meqsitining "Uyghurlarni pütün bir millet süpitide yoqitish" ikenkini ilgiri sürgen.

Toluq bet