Әнглийә парламент әзалириниң «хуавей» ниң уйғурларни бастурушқа ярдәмләшкәнлики һәққидики мәктупи хитайни биарам қилған

Мухбиримиз әркин
2020-01-06
Елхәт
Пикир
Share
Принт

Әнглийә парламент әзалириниң «хуавей» ниң уйғурларни бастурушқа ярдәмләшкәнлики һәққидики мәктупи хитайни биарам қилған

Әнглийә парламент әзалириниң өткән йили 12‏-айда әнглийә ташқи ишлар министири доминик раабқа мәктуп йезип, «хуавей» ширкитиниң хитайниң уйғурларни бастурушиға ярдәмлишиватқанлиқини илгири сүрүши һәмдә әнглийә һөкүмитидин буни тәкшүрүшини тәләп қилиши хитайни биарам қилған.

Хитайниң әнглийәдики әлчиси лю шавмиң 5‏-январ күни әнглийә «йәкшәнбилик телеграф» гезитидә мақалә елан қилип, «хуавей» мәсилисидә әнглийәни агаһландурған. Униң тәкитлишичә, әгәр әнглийә «хуавей» ни чәклисә, бу әнгилийә-хитай мунасивәтлиригә бузғунчилиқ қилидикән.

Хитай әлчиси бу агаһландурушни әнглийә парламент әзалириниң уйғурлар һәққидики мәктупидин бир қанчә һәптә кейин елан қилған. Әнглийә парламентиниң бир қанчә әзаси ташқи ишлар министири раабқа язған мәктупида «хуавей» ниң шинҗаң җ х органлириға техникалиқ ярдәм бериватқанлиқи, «бу ширкәтниң шинҗаң җ х органлириға тор бошлуқи техникасини тәрәққий қилдуруп, униң уйғур мусулманлирини контрол қилиши вә бастурушини қулайлаштуруп бәргәнлики» тәкитләнгән.

Мәктупта йәнә «хуавей» ниң ақсу вилайәтлик җ х идарисигә санлиқ учур мәркизи шундақла қаримай җ х даирилирини аммиви бихәтәрлик тор суписи билән тәминлигәнлики, мәзкур ширкәтниң йәнә 2018‏-йили үрүмчи шәһәрлик җ х идариси билән һәмкарлишип, «истихбарат, хәвпсизлик тәҗрибиханиси» қурғанлиқи илгири сүрүлгән иди.

Хитай әлчиси лю шавмиң мақалисидә «хуавей» ниң «шинҗаң җ х органлири» ға ярдәмлишиватқанлиқини тилға елинмиған. Лекин у «хуавей» ниң чәклиниши әнглийәниң технологийәсини арқида қойидиғанлиқини илгири сүргән. Лю шавмиң шу күни йәнә тветтерда пикир билдүрүп, «хуавей» ниң чәклиниши «чәтәл сәрмайидарлириниң ишәнчини йоқитип, әнгилийә-хитай һәмкарлиқиға тәсир көрситидиғанлиқи» ни билдүргән. Әнглийә парламент әзалириниң мәктупида әнглийә һөкүмити «хуавей» ниң уйғурларни бастурушқа ярдәмләшкәнликини тәкшүрүшкә чақирилған иди.

Пикирләр (0)
Share
Толуқ бәт