En'gliye parlamént ezalirining "Xu'awéy" ning Uyghurlarni basturushqa yardemleshkenliki heqqidiki mektupi xitayni bi'aram qilghan

Muxbirimiz erkin
2020-01-06
Élxet
Pikir
Share
Print

En'gliye parlamént ezalirining "Xu'awéy" ning Uyghurlarni basturushqa yardemleshkenliki heqqidiki mektupi xitayni bi'aram qilghan

En'gliye parlamént ezalirining ötken yili 12‏-ayda en'gliye tashqi ishlar ministiri dominik ra'abqa mektup yézip, "Xu'awéy" shirkitining xitayning Uyghurlarni basturushigha yardemlishiwatqanliqini ilgiri sürüshi hemde en'gliye hökümitidin buni tekshürüshini telep qilishi xitayni bi'aram qilghan.

Xitayning en'gliyediki elchisi lyu shawming 5‏-yanwar küni en'gliye "Yekshenbilik télégraf" gézitide maqale élan qilip, "Xu'awéy" mesiliside en'gliyeni agahlandurghan. Uning tekitlishiche, eger en'gliye "Xu'awéy" ni cheklise, bu en'giliye-xitay munasiwetlirige buzghunchiliq qilidiken.

Xitay elchisi bu agahlandurushni en'gliye parlamént ezalirining Uyghurlar heqqidiki mektupidin bir qanche hepte kéyin élan qilghan. En'gliye parlaméntining bir qanche ezasi tashqi ishlar ministiri ra'abqa yazghan mektupida "Xu'awéy" ning shinjang j x organlirigha téxnikaliq yardem bériwatqanliqi, "Bu shirketning shinjang j x organlirigha tor boshluqi téxnikasini tereqqiy qildurup, uning Uyghur musulmanlirini kontrol qilishi we basturushini qulaylashturup bergenliki" tekitlen'gen.

Mektupta yene "Xu'awéy" ning aqsu wilayetlik j x idarisige sanliq uchur merkizi shundaqla qarimay j x da'irilirini ammiwi bixeterlik tor supisi bilen teminligenliki, mezkur shirketning yene 2018‏-yili ürümchi sheherlik j x idarisi bilen hemkarliship, "Istixbarat, xewpsizlik tejribixanisi" qurghanliqi ilgiri sürülgen idi.

Xitay elchisi lyu shawming maqaliside "Xu'awéy" ning "Shinjang j x organliri" gha yardemlishiwatqanliqini tilgha élinmighan. Lékin u "Xu'awéy" ning cheklinishi en'gliyening téxnologiyesini arqida qoyidighanliqini ilgiri sürgen. Lyu shawming shu küni yene twéttérda pikir bildürüp, "Xu'awéy" ning cheklinishi "Chet'el sermayidarlirining ishenchini yoqitip, en'giliye-xitay hemkarliqigha tesir körsitidighanliqi" ni bildürgen. En'gliye parlamént ezalirining mektupida en'gliye hökümiti "Xu'awéy" ning Uyghurlarni basturushqa yardemleshkenlikini tekshürüshke chaqirilghan idi.

Toluq bet