En'gliye soti Uyghur teshkilatining “Shinjang paxta” mehsulatlirini cheklesh erzini ret qilghan

En'gliye sot mehkimisi 20-yanwar dunya Uyghur qurultiyi bilen en'gliyediki “Yershari qanun herikiti tori” ning birliship en'gliye hökümiti üstidin sun'ghan “Shinjang paxta” mehsulatlirini cheklesh erzide hökümetni yolluq, dep höküm chiqarghan. Bu ikki teshkilat ötken yili en'gliye sotigha erz qilip, en'gliye ichki ishlar ministirliqi we döletlik jinayi ishlar idarisini “Sherqiy türkistanda Uyghurlarni qullar emgikige sélip ishlepchiqirilghan paxta mehsulatlirini cheklimey” en'gliyening munasiwetlik qanunlirigha xilapliq qilish bilen eyibligen. Sot mehkimisi bu erzni qobul qilghanidi.

Dunya Uyghur qurultiyining bildürüshiche, sot mehkimisi en'gliye da'irilirining bu xil mehsulatlarni tekshürüsh we cheklesh hoquqi bolsimu, lékin da'irilerge paydiliq höküm chiqarghan. Mezkur teshkilat 20-yanwar élan qilghan bu heqtiki bayanatida:“Sotning en'gliye hökümitining atalmish <yéterlik oylinish> toghrisidiki pozitsiyesini qobul qilishidin qattiq ümidsizlen'genliki” ni bildürgen. Bayanatta körsitilishiche, bu qarar “Import qilghuchilarning mejburiy emgek mehsulatlirini bazar bahasida sétiwalsila, ular bu mallarning wehshiylik jinayitining mehsuli ikenlikini bilip turghan teqdirdimu, héchqandaq jazagha uchrimasliqidek körünerlik weziyetni shekillendüridiken”.

Bayanatta yene :“Hökümetning pozitsiyesi britaniye birleshme padishahliqini xelq'araliq zitliq we insaniyetke qarshi jinayet hem irqiy qirghinchiliqning mehsuli bolghan mallarni import qilghuchilarning bixeter panagahigha aylandurup qoyidu” déyilgen.

Bayanatta éytilishiche, dunya Uyghur qurultiyi bilen yershari qanun herikiti tori sotning  hökümige naraziliq erzi sunushni oylishidiken. Bayanatta, yershari qanun herikiti tori we dunya Uyghur qurultiyining xitay da'iriliri teripidin türkiy xelqlerge qarita sadir qiliniwatqan qebih wehshiy jinayetlerni xelq'araliq jawabkarliqqa tartishni dawamliq ilgiri süridighanliqi'i bildürülgen.