En'gliye hökümiti xitayning jasusluq herikitige taqabil turush üchün xitaygha béridighan wizalarni qisqartidiken

En'gliye hökümiti xitayning jasusluq herikitige taqabil turush üchün, xitaydin resmiy ziyaret bahanisi bilen kélidighan kishilerning sanini tizginleshni oylashmaqtiken.

“Blumbérg géziti” ning xewiridin qarighanda, en'gliyege hökümet we tijaret ishliri üchün resmiy ziyaret bilen kélidighanlargha adette arqa körünüsh tekshürüsh telipi qoyulmaydiken. Shunga en'gliye rishi sunak hökümiti bu sistémining xitay hökümiti teripidin suyi'istémal qilinip, xitay jasuslirining en'gliyege kirishige qulayliq yaritip bérishining aldini élish üchün xitay puqralirigha bérilidighan resmiy ziyaret wizilirini qisqartmaqchi bolghan.

Ismini ashkarilashni xalimighan bir hökümet emeldarining “Blumbérg” qa bildürüshiche, en'gliyening munasiwetlik da'iriliri resmiy ziyaretlerning sanini qandaq kontrol qilish, sanini qandaq békitish we döletning qollishidiki ziyaretlerning da'irisini békitishke oxshash mezmunlarni muzakire qilmaqtiken. En'gliye bixeterlik da'iriliri xeterni azaytish üchün bu jehettiki qa'idilerni chingitidiken.

En'gliye hökümitining bu herikiti del xitay hökümitining en'gliyediki tesir küchining uniwérsitétlardin tartip, halqiliq kesiplergiche kéngiyiwatqanliqi heqqidiki endishiler zorayghan mezgilge toghra kelgen. “Blumbérg” ning xewiride déyilishiche, en'gliye herbiy istixbarati 5-bashqarmisining mes'uli kén makkallum bultur élan qilghan bir bayanatida, ötken yildin buyan xitay jasuslirining en'gliyediki her sahede xizmet qilidighan 20 mingdin artuq kishige yéqinliship, ular bilen alaqe qurushqa urun'ghanliqini bildürgen we xitay peyda qiliwatqan tehditning qattiq éghirliqini agahlandurghan.