En'gliye hökümiti xitay ayropilanliridiki mejburiy emgek mehsulatlirini tekshürüshke chaqirilghan

En'gliye hökümiti Uyghur élidin en'gliyege uchidighan nöwetchi ayropilanlarning en'gliyege mejburiy emgek mehsulatlirini toshushining aldini élishqa we uni chekleshke chaqirilghan.

31-Yanwar, “Siyasetchi” torida élan qilin'ghan bu xewerde déyilishiche, yéqinda en'gliye parlaménti partiye halqighan kishilik hoquq komitéti re'isi dawid alton en'gliye hökümitige xet yézip, Uyghur élidin en'gliyege uchidighan nöwetchi ayropilanlarning yük toshush ishlirigha mes'ul kishi teminligen uchurlargha diqqet qilishini telep qilghan. U xétide: “Men bu ayropilanlarning xitayning mejburiy emgek mehsulatlirini en'gliyege toshushidin ensireymen” dégen.

Xewerde déyilishiche,  2024-yildin buyan Uyghur élidin en'gliyege qatnaydighan 3 hawa yoli échilghan bolup, yawropaning “Titan” awiyatsiye shirkiti ayropilanliri her ikki künde bir qétim ürümchi bilen london arisida qatnaydiken. Bu ayropilan 2024-yil 12-aydin bashlap, mexsus torda zakaz qilin'ghan mehsulatlarni toshush mulazimitini qilghan. Shuning bilen bir waqitta, yawropa mal toshush shirkiti 10-aydin bashlap Uyghur élidin en'gliyening kardif shehirige awiyatsiye mal toshush liniyesi qurup chiqqan bolup, heptide üch qétim ayropilanda mal toshuydiken, bu mallarmu asasen torda zakaz qilin'ghan mallar iken. Éytishlargha qarighanda, bu ayropilanlar bir qatnishida 59 tonna mal toshughan.

Kishilik hoquq komitéti re'isi dawid alton en'gliye hökümiti ichki ishlar ministirliqigha yazghan xette, en'gliye tamozhna orunlirining bu mesilini tekshürüshi telep qilin'ghan bolsimu, ichki ishlar ministiri hanson en'gliyege qerellik kirip turghan bu mallarning mejburiy emgek mehsulatliri ikenlikini békitishning qiyin ikenlikini bildürgen. Dawid alton en'gliye tamozhna orunlirining ta hazirghiche bu mesilini tekshürmigenlikini eyiblep: “Mana bu, hökümetning meghlubiyitidur, en'gliye hazir xitayning exletxanisigha aylinip qaldi” dégen.