Әнгилийә ишлитиватқан хитай камералириниң уйғур районидики лагерларғиму орунлаштурулғанлиқи мәлум болған

Мухбиримиз әркин
2021-11-29
Share

Әнгилийәниң хитай технологийә ширкәтлиридин сетивелип ишлитиватқан бихәтәрлик камералириниң уйғур районидики җаза лагерлириғиму орунлаштурулғанлиқи мәлум болған.

‍Әнгилийәниң "йәкшәнбилик почта" гезитиниң хәвәр қилишичә, әнгилийәниң икки хитай ширкитидин сетивалған 275 миңдин артуқ айрим тор арқилиқ әнгилийәликләрни назарәт қилишта ишлитиватқан бихәтәрлик камиралириниң уйғур елидики 5 җаза лагериғиму орунлаштурулғанлиқи байқалған.

Хәвәрдә бу камераларниң һәммисини хитайниң хәйкаң технологийә ширкити билән дахуа технологийә гуруһи ишләпчиқарғанлиқи, әнгилийәниң дунядики хитай ишләпчиқарған бихәтәрлик камералирини ишлитидиған 4-чоң дөләт икәнлики тәкитләнгән. Хәйкаң ширкити билән духуа гуруһи хитай һөкүмитиниң уйғур елида юқури техникалиқ назарәт системиси қуруп, уйғурларға "ирқий қирғинчилиқ" йүргүзүшигә ярдәмлишиш билән әйиблинип кәлгән хитай технологийә ширкәтлиридур. Бу икки ширкәт 2020-йили американиң сабиқ трамп һөкүмити тәрипидин "қара тизимлик" кә киргүзүлгән иди.

"йәкшәнбилик почта" гезитиниң ейтишичә, бу әһвални америкадики IPVM намлиқ бир тор бихәтәрлик тәтқиқат орни байқиған болуп, бу орун йеқинда уйғур елиға берип райондики җаза лагерлирини мәхпий синға елип чәт әл иҗтимаий таратқулирида елан қилған хитай паалийәтчисиниң синлиқ сүрәтлирини анализ қилған. Улар бу арқилиқ 5 лагердики бихәтәрлик камералириниң әнгилийә ишлитиватқан хәйкаң вә дахуа ширкәтлириниң мәһсулати билән охшаш икәнликини байқиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт