En'gliyening b d t da turushluq wekili xitayni “Shinjangdiki basturush siyasiti” ni özgertishke chaqirdi

En'gliyening b d t turushluq mu'awin da'imiy wekili rita french b d t kishilik hoquq kéngishining 52-qétimliq yighinida bayanat élan qilip, xitayni özining Uyghur rayoni we tibettiki basturush siyasitini özgertishke chaqirghan. Rita frenchning tekitlishiche, xitay b d t kishilik hoquq aliy komissari ishxanisining “Shinjang doklati” diki tewsiyelirini choqum ijra qilishi we xelq'ara mejburiyitini ada qilishi kérek” iken.

Rita french bu chaqiriqni b d t kishilik hoquq kéngishining 22-mart küni ötküzülgen 52-qétimliq yighinining omumiy munazire yighinida otturigha qoyghan. Bu yighinda xitay wekili muweppeq bolalmighan bolsimu, emma ammiwiy teshkilatlargha wakaliten söz qilip, b d t gha eza döletlerni xitayning Uyghur rayonidiki “Irqiy qirghinchiliqi” we “Insaniyetke qarshi jinayiti” ni toxtitishqa chaqirghan dunya Uyghur qurultiyi re'isi dolqun eysagha kashila qilishqa urun'ghanidi.

En'gliye tashqi ishlar ministirliqining toridiki uchuridin melum bolushiche, rita french bayanatida rusiyening ukra'inadiki zorawanliq heriketlirini, misirning axbarat erkinlik xatirisini tenqidlesh bilen bir waqitta, “Xitayning uniwérsal kishilik hoquqqa perwa qilmasliqi chongqur endishe qozghaydu, biz ularni tibet we shinjangdiki basturush siyasitini özgertishke chaqirimiz” dégen.

Rita french yene ؛ “Bolupmu xitay choqum b d t kishilik hoquq ‍ali komissari ishxanisining ötken yili élan qilghan shinjang doklatidiki tewsiyelerni ijra qilishi, xelq'ara mejburiyitini ada qilishi kérek” dep körsetken. Rita frenchning bayanati en'gliye parlaménti hökümetning xitaygha qarita téximu qattiq siyaset tutushini, bolupmu Uyghurlar mesiliside konkrét tedbir élishini telep qiliwatqan bir waqitta élan qilin'ghan.