En'gliye emgek partiyesi Uyghur irqiy qirghinchiliqini xelq'ara sot arqiliq étirap qildurushning yolini izdeydiken

En'gliyediki ikki asasliq partiyening biri bolghan emgek partiyesi özliri hakimiyet béshigha kelgen teqdirde, Uyghurlar körüwatqan zulumni xelq'ara sot arqiliq “Irqiy qirghinchiliq” dep jakarlashning qanuniy yollirini izdeydighanliqini bildürgen.

Emgek partiyesi öktichi kabinétining tashqi ishlargha mes'ul ministiri dawid lammi (David Lammy) “Politiko” gézitige qilghan sözide mundaq dégen: “Eger emgek partiyesi kéyinki en'gliye hökümitini teshkil qilghan teqdirde, biz shériklirimiz bilen köp tereplimilik heriket qilip, xelq'ara sotta xitayning herikitining irqiy qirghinchiliq dep étirap qilinishi üchün heriket qilimiz”.

2021-Yili emgek partiyesining zor küch chiqirishi bilen en'gliye parlaménti xitayning Uyghurlargha qiliwatqan zulumini “Irqiy qirghinchiliq” dep jakarlighanidi. Emma hökümette bu étirap qilinmighan.

Dawid lammi “Politiko” gézitining (POLITICO) so'aligha jawab bergende: “Emgek partiyesining meydanida özgirish bolmighanliqini, özliri hökümet qurghan teqdirde bu mesilini ‛irqiy qirghinchiliq‚ tonuydighanliqi” ni tekitligen. U yene mundaq dégen:

“Biz shériklirimiz bilen köp tereplimilik heriket qilimiz. Parlamént ilgiri irqiy qirghinchiliq toghrisida qarar chiqirip bolghan. Xelq'ara jem'iyet irqiy qirghinchiliqqa intayin köngül bölidu”.

“Politiko” géziti öz xewiride yene, dunya Uyghur qurultiyining en'gliyediki ishxanisi mudiri rehime mehmud xanimni ziyaret qilghan, rehime xanim dawid lammining sözlirining kishini ilhamlanduridighanliqini bildürgen hemde en'gliye hökümitidiki konsérwatip ezalar gerche Uyghur mesilisige köngül bölsimu emma hökümetning hazirghiche emeliy ish qilmighanliqini hetta bu zulumgha munasip isimmu qoymighanliqini eskertken.

Melum bolushiche, dawid lammi yene, Uyghur mesilisini birleshken döletler teshkilatining irqiy qirghinchiliq we insaniyetke qarshi jinayetke munasiwetlik komitétliri arqiliq kötürüp chiqishningmu yolini qilidighan bolup, bu uning tashqi ishlar ministiri bolghandin kéyinki muhim kün tertipining biri bolidiken.