Лондонниң шәрқигә җайлашқан хитай әлчиханиси әтрапидики йолға уйғур вә тибәтләрни қоллайдиған нам берилидикән

Өткәнки хәвиримиздә, лондонниң шәрқигә җайлашқан товер хамлетс райони шәһәр комитети әзалириниң бу районға көчүп кәлмәкчи болған хитай әлчиханисиниң әтрапидики йолларға “уйғур сәйнаси, хоңкоң йоли” дегәндәк намлар беришни ойлишиватқанлиқи һәққидә мәлумат бәргәнидуқ.

2018-Йил хитай лондон мунариниң удулиға җайлашқан завут бинасини 250 милйон фонд стерлиңға сетивелип, явропа бойичә әң чоң әлчихана салмақчи болған. Әмма хитайниң хоңкоңни бастуруши, уйғурларға ирқий қирғинчилиқ йүргүзүши сәвәбидин әнглийә парламенти әзалири, болупму товер хамлетс райони вәкиллири буниңға қарши чиққан. Әркин демократлар партийәсидин болған рабина хан өткән һәптә бир тәклип сунуп, хитай әлчиханиси җайлишидиған кәбил кочисиниң фашизм вә ирқий қирғинчилиққа қарши турушниң символиға айланған тарихий бир җай икәнликини, хитай әлчиханисиниң бу йәргә җайлишишиға қарши чиқмисиму, хитайниң кишилик һоқуқ дәпсәндичиликигә қарши туридиғанлиқини билдүргән.

Товер хамлетс райони шәһәр комитети хитай әлчиханисиниң әтрапидики йол вә қурулушларға “тйәнәнмен мәйдани, уйғур сәйнаси, хоңкоң йоли, тибәт теғи” дәп нам бериш тоғрулуқ беләт ташлиған. Йеқинда йәнә мәзкур шәһәр райони комитети бу тәклипни қоллайдиған 700 парчә елхәт тапшурувалған.