En'giliye awam palatasi Uyghur “Irqiy qirghinchiliq” xitapnamisini awazgha qoyidu

En'giliye parlaméntining awam palatasi 22-april xitayning Uyghurlargha “Irqiy qirghinchiliq” qiliwatqanliqini étirap qilish toghrisidiki bir xitapnamini awazgha qoyidiken. En'giliye “Muhapizetchi” gézitining xewer qilishiche, bu xitapnamini sun'ghuchilar awam palatasidiki her qaysiy partiyelerdin bolghan 3 den 2 qisim ezaning qollishigha érishishishi ümid qilmaqta iken. Eger bu xitapname maqullansa, en'giliye xitayning Uyghurlargha “Irqiy qirghinchiliq” qiliwatqanliqini étirap qilghan 4-dölet bolup qalidiken.

“Muhapizetchi” gézitining bildürüshiche, xitapnamide “Awam palatasi shinjang rayonidiki Uyghurlar we bashqa étnik, diniy az sanliqlarning insaniyetke qarshi jinayet we irqiy qirghinchiliqqa duchar boluwatqanliqigha ishinidu,” déyilgen, shuningdek en'giliye hökümitining irqiy qirghinchiliqning aldini élish ehdinamisidiki mejburiyitini ada qilishi we bashqa xelq'ara qanuniy wastilarni qollinip, irqiy qirghinchiliqqa xatime bérishi telep qilin'ghan.

Xewerde éytilishiche, xitapnamining hökümetni mejburlash küchi bolmisimu, biraq köp sandiki parlamént ezalirining xitayni Uyghurlargha “Irqiy qirghinchiliq” qildi, dep eyiblishining diplomatik we exlaqiy tesir küchi zor bolidiken. Xewerde en'giliye awam palatasining “Irqiy qirghinchiliq” toghrisida kolliktip qarar chiqirishi az uchraydighan ehwal bolsimu, biraq buning örnekliring barliqini, awam palatasining 2016-yili nölge qarshi 278 awaz bilen “Islam döliti” ning yezidilerge “Irqiy qirghinchiliq” qilghanliqini élan qilghanliqi tekitlen'gen.