Әнгилийә ташқий ишлар министири: “уйғурларниң мәҗбурий әмгәккә селиниватқанлиқиға аит пакитлар интайин күчлүк”

Әнгилийә хитайниң уйғурларни мәҗбурий әмгәккә селиватқанлиқи һәққидики пакитларниң интайин ишәнчиликликини ейтқан.

Ройтерс агентлиқиниң хәвиригә қариғанда, әнгилийәниң ташқий ишларға мәсул министири нигил адамс әнгилийә парламентида сөз қилип мундақ дегән: “шинҗаңда вә хитайниң башқа җайлирида уйғурларниң мәҗбурий әмгәккә селиниватқанлиқи һәққидики испатлар интайин ишәнчлик. Бу испатлар күнсери көпийиватиду, күчийиватиду. Бу вәзийәт әнгилийә һөкүмитини әндишигә салмақта.”

Нигил адамс йәнә йеқинда аз дегәндә йерим милйондин артуқ уйғурниң мәҗбурий пахта теришқа селинғанлиқи һәққидә чиққан хәвәрләр үстидиму тохтилип, хәлқарадики даңлиқ кийим-кечәк маркилириниң мана мушу мәҗбурий әмгәк асасидики пахтиларни хам әшя қиливатқанлиқини, буниңға хатимә берилиши керәкликини ейтқан.

Хитай һөкүмитиниң уйғурларни мәҗбурий әмгәккә селиш асасида ишләпчиқириливатқан мәһсутларниң һазир дуня базирини игилигән болушидин ибарәт бу пакит америка вә яврупадики дөләтләрдә күчлүк муназирә қозғимақта. Бу дөләтләрдики нурғун сиясийонлар, кишилик һоқуқ актиплири мәҗбурий әмгәк асасидики мәһсулатларни сетивалмаслиқ һәққидә хәлқ аммисиға чақириқ қилиш билән биргә, һөкүмәтләрни буниңға қарши тәдбир қоллинишқа чақирмақта.