Xotende “Eqliy iqtidarliq mektep bashqurush supisi” omumlashturulmaqtiken

Muxbirimiz irade
2023.03.02

Nöwette xitay da'iriliri xotenning ma'arip ishlirini reqemleshtürüsh we bir tutash bashqurush xizmitini qanat yayduruwatqan bolup, bu xizmet bultur tyenjin shehirining “Shinjanggha yardem bérish” namidiki qurulush türi boyiche yolgha qoyulghan iken.

“Xitay xewerler tori”ning 1- marttiki xewiridin qarighanda, mezkur tür boyiche tiyenjin shehiri 2022-yilidin bashlap kériye, niye we chira nahiyeliridiki 23 mektepning eqliy iqtidarliq mektep bashqurush supisini tereqqiy qildurghan iken. Xewerde bu supa arqiliq “Oqughuchilar, oqutquchilar we ata-anilarni köp xil usulda baghlap, oqutush we mektep bashqurushni ünümlük maslashturghili, muqim, bixeter mektep muhiti qurghili bolidighanliqi, oqutush menbesini birdek teqsimligili bolidighanliqi” bayan qilin'ghan. Bu supa arqiliq hetta oqughuchilar ashxanisidiki yémekliklermu bashqurulidiken.

Diqqet qozghaydighini, xewerde mektep hoylisini uchurlashturush toluq emelge ashurulghandin kéyin, uning da'irisining kéngeytilidighanliqi we uning “Chong sanliq melumat ambiri” bilen birleshtürülidighanliqi diyilgen.

“Xitay xewerler tori” öz xewiride, “Eqliy iqtidarliq mektep bashqurush supisi mektep ma'arip we oqutushni bashqurushni elalashturup, bashqurush ünümi we süpitini östürdi. Yene bir tereptin, mektepke qatnishishni bashqurush, ashxana matériyallirini bashqurush, xizmet orunlashturush, sanliq melumat yollash, xizmet alaqisi, höjjet bashqurush qatarliqlarning hemmisini qéliplashturdi” dep bayan qilsimu, biraq buning xitay hökümitining Uyghur élida yolgha qoyuwatqan yuqiri téxnikiliq nazaret sistémisining bir parchisi ikenliki texmin qilinmaqta.

Chong sanliq melumat ambiri xelq'aradiki kishilik hoquq organliri tenqid qilip kéliwatqan bir supa bolup, u rayondiki Uyghurlarni asas qilghan her bir kishige a'it sezgür uchurlarni öz ichige alghan.

Melum bolushiche, xotendiki mekteplerni reqemleshtürüsh xizmiti bu yil izchil dawam qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.