Erkin asiya radiyosi bixeterlik sewebidin xongkongdiki ishxanisini taqaydighan boldi

Erkin asiya radiyosi 29-mart küni xongkong hökümitining “Négizlik qanuni” ning 23-maddisini maqullishi sewebidin özining 28 yildin béri xizmet qilip kéliwatqan xongkongda turushluq ishxanisini taqaydighanliqini élan qildi. Erkin asiya radiyosi pirézidéntining bu heqtiki bayanatida qeyt qilishiche, 23-maddining maqullinishi mezkur radiyoning xongkongda turushluq muxbirliri we ishxana xadimlirining bixeterlikige bolghan endishilerni kücheytken. Lékin bayanatta radiyoning pirézidénti bey fang, xongkongda turushluq ishxana taqalsimu, emma uning hökümetke tizimlitishni dawamlashturidighanliqi we pütün künlük xizmetchisi bolmaydighanliqini éytqan. Xongkong ilgiri asiyadiki axbarat we söz erkinlikining qorghini, dep qarilip kelgen, bu alahidilik xongkongning xelq'ara pul -mu'amile we axbarat merkizi bolushigha türtke bolghanidi.

Lékin xongkongning ötken hepte xongkong “Négizlik qanuni” ning 23-maddisi asasida “Dölet bixeterlikini qoghdash nizami” ni maqullishi, xongkong axbarat muhitidiki ensizlikni kücheytken. Bu nizam xongkongda yéngi jinayet türlirini turghuzup, hökümetning xilapliq qilghuchilarni jazalishi, öktichilerni basturushigha yéngi hoquqlarni bergen.

Xongkong dölet bixeterlik nizamida “Tashqi tehdit” we “Dölet bixeterliki” uqumigha xitaygha oxshash keng hem müjmel éniqlima bérilgen, dep qaralmaqta. Kishilik hoquq teshkilatlirining qeyt qilishiche, xitayning 2015-yili Uyghur diyarida maqullighan “Radikalliqni tügitish nizami” dimu diniy radikalliqqa keng hem müjmel éniqlima bérilip, bu, 2017-yili bashlan'ghan chong tutqunda yüz minglighan Uyghurning tutqun qilinishigha yol achqaniken.