Әркинлик сарийи интернет алақә тори әркинликигә аит йиллиқ доклатини елан қилди

Мухбиримиз ирадә
2019-11-05
Елхәт
Пикир
Share
Принт

Америкадики нопузлуқ кишилик һоқуқ органлиридин «әркинлик сарийи» 5-ноябир күни дунядики 65 дөләтниң иҗтимаий алақә тори әркинлик әһвалиға қарап чиқилған йиллиқ доклатини елан қилди.

«Иҗтимаий алақә тори кризиси» мавзусида елан қилинған бу йиллиқ доклатта кишиләрниң пикир вә муназирә әркинликигә сорун һазирлап бериватқан алақә торлирини истибдат һакимийәтләрниң пикир җәһәттин өзлиригә яқмайдиған кишиләрни назарәт қилидиған, бекитидиған, уларниң пикирлирини җинайәт пакити сүпитидә йиғидиған сорунларға айландурулуватқанлиқи баян қилинған. Доклатта тәкитлинишичә, иҗтимаий алақә торлири һазир истибдат һакимийәтләрниң инсанларни тәқиблишини вә уларға зәрбә беришини қолайлаштурмақтикән.

Мәзкур доклатта хитай бу йилму «интернет әркинликини әң еғир дәпсәндә қилғучи» дөләт болуп баһаланған болуп, хитай һакимийитиниң интернетқа қаратқан контрол вә чәклимиси илгирики йилларда көрүлүп бақмиған дәриҗидә еғирлашқан. Хитай һөкүмитиниң интернеттики учурни қамал қилиш дәриҗиси хоңкоңдики хитай һөкүмитигә қарши намайишлар мунасивити билән әң юқири пәллигә чиққан. Доклатта йәнә хитай һөкүмитиниң уйғур елидики интернет тори саһәсигә қаратқан контрол вә бастуруши һәққидиму тәпсилий мәлуматлар берилгән болуп, униңда уйғур елидә йолға қоюлған «қайта тәрбийә лагерлири «ға адәм тутушта хитай һөкүмитиниң дәл мушу интернет алақә торини ишләткәнлики, мәсилән кишиләрни телефониға ватсәп чүшүргәнлики, чәтәлләрдики туғқанлири билән алақә қилғанлиқи яки дини мәзмундики материялларни көргәнликидәк сәвәбләр билән лагерға қамиғанлиқини баян қилған.

Доклатта йәнә, хитай хаккирлириниң чәтәлләрдики уйғурлар қол телефонлириға вә улар көп зиярәт қилидиған тор бәтләргә хаккирлиқ һуҗуми қозғиғанлиқиму тилға елинған. Доклатта «шинҗаң райони хитай һөкүмитиниң дигитал истибдатлиқ моделини синақ қилидиған базиси қилинмақта. Бу йәрдә мувәппәқийәт қазанған дигитал истибдатлиқ модели хитайниң башқа өлкилиригә омумлаштурулмақта» дәп көрситилгән.

Пикирләр (0)
Share
Толуқ бәт