“Erkinlik sariyi” tutqundiki “Siyasiy mehbuslar” üchün erkinlik telep qildi

Amérikadiki nopuzluq kishilik hoquq teshkilati bolghan “Erkinlik sariyi” 10-ayning 31-küni “Siyasiy mehbuslar xelq'araliq küni” munasiwiti bilen X (tiwittér) da qisqa widiyo élan qilip, xitay hökümitini yéqinqi yillardin buyan türmige solighan atalmish “Siyasiy jinayetchiler” ni qoyup bérishken chaqirghan.

Bu widiyoda körsitilgen “Siyasiy mehbuslar” ichide, xitay hökümiti ömürlük qamaqqa höküm qilghan piroféssor, folklorshunas rahile dawut, öch élish xaraktérlik tutqun qilinip, 20 yilliq késiwétilgen doxtur gülshen abbas, “Kowidni nölge chüshürüsh” qamal siyasitige qarshi qozghalghan namayishning widiyosini wichatta hembehirligenliki üchün 3 yilliq késiwétilgen kamile wahit qatarliqlar orun alghan.

 “Erkinlik sariyi” X da yollighan uchurida, “Xitay hökümitini dunya boyiche siyasiy mehbuslar eng köp solan'ghan dölet déyishke bolidu. Ularning ichide kishilik hoquqni qoghdighuchilar, muxbirlar, torlarda özining oxshimighan siyasiy pikrini otturigha qoyghuchilar bar. Ularning hemmisi naheq solinip, eqelliy erkinlikidin mehrum qilin'ghan kishilerdur” dep yazghan.

Xitay hökümiti Uyghur rayonida “Siyasiy jinayetchi” dep tutqan Uyghurlarning sani köp bolup, 2016-yildin bashlapla bu sanning shiddet bilen köpeygenliki melum. Uyghur kishilik hoquq qurulushi 2021-yil élan qilghan doklatta, xitayning 300 din artuq Uyghur medeniyet serkilirini—tetqiqatchi, yazghuchi, sha'irlarni siyasiy seweb bilen tutqun qilip lagér we türmilerge qamighanliqi élan qilin'ghanidi.