Xitay hökümiti bu yil Uyghur emgek küchlirini yötkeshni jiddiyleshtürgen
Xitay hökümiti bu yil Uyghur yéza emgek küchlirini yötkesh qedimi téximu kücheytken. Melum bolushiche, bu yil 1-ay ichide Uyghur rayonidin yötkelgen yéza emgek küchlirining sani az kem 20% artqan.
-
Muxbirimiz erkin
2019-02-06 -
-
-
Xitay hökümiti bu yil Uyghur yéza emgek küchlirini yötkesh qedimi téximu kücheytken. Melum bolushiche, bu yil 1-ay ichide Uyghur rayonidin yötkelgen yéza emgek küchlirining sani az kem 20% artqan.
Xitay hökümitining Uyghur “Yéza éshincha emgek küchlirini yötkep ishqa orunlashturush” programmisi Uyghur kishilik hoquq teshkilatlirining izchil tenqidige uchrap kelgen. Ular xitayning bu programmisini toxtitishqa chaqirip, uning Uyghurlarni mejburiy ichkirige yötkeshtek bu herikiti Uyghurlarning öz yurti bilen bolghan tarixi, medeniyet, a'ile béghini ajizlashturushqa qaritilghanliqini ilgiri sürgen.
Uyghur aptonom rayonluq adem küchi we ijtima'iy parawanliq nazaritining “Shinjang géziti” ge ashkarilishiche, bu yil 1-ayda rayondiki sheher-bazarlarda 41 ming 500 adem ishqa orunliship, ötken yilning oxshash mezgilidin 13.22 Pirsent artqan. Buning aldida yerlik da'iriler xitayning memliket miqyasigha Uyghur rayonining ma'arip, saqchi orunlirigha adem qobul qilish heqqide nurghun élan chiqarghan idi.
Aptonom rayonluq adem küchi we ijtima'iy parawanliq nazariti oxshash mezgilde yene bashqa jaylargha yötkelgen Uyghur yéza emgek küchlirining 137 ming adem qétimgha yetkenlikini bildürgen. Ularning bayan qilishiche, buni ötken yilning oxshash mezgilige sélishturghanda 3.18 Pirsent artuq iken. Lékin bu san Uyghur aptonom rayonining ichi we sirtigha yötkelgenlerning hemmisini yaki mexsus ichkirige yötkelgenlerni körsitidighanliqi melum emes. Emma xewerde, bu yil 1-aydila 3151 ademning ichkiridiki zawut-fabrikilargha yötkep orunlashturulghanliqi bildürülgen.
Da'iriler buninggha héchqandaq chüshenche bermigen. Melum bolushiche, 1-ay ichide ishqa orunlashqan sheher-bazar ahalilirining az kem 60 pirsenti kichik tipliq shexsi igiliklerde ishqa orunlashqan. Xewerde bu orunlarda ishqa orunlashqanlarning 15.26 Pirsent, chong we ottura tipliq karxanilarda ishqa orunlashqanlarning 26. 33 Pirsent artqanliqini bildürülgen. Közetküchilerning ilgiri sürüshiche, bir ay ichide bunchilik köp ademning ishqa orunlishishi ularda guman qozghighan. Közetküchiler, buning lagérdiki bir qisim tutqunlarni karxanilargha yötkesh bilen munasiwetlik bolushi mumkinlikini ilgiri sürmekte. Yéqinda xelq'aradiki bezi nopuzluq taratqular xitayning lagérlarda karxana qurup, bir qisim tutqunlarni mejburiy emgekke séliwatqanliqini ilgiri sürgen.