Xoten shehiride “Éshincha emgek küchliri” ni yötkep terbiyelesh bashlanmaqchi

Xelq'araning bésimi astida xitay hökümiti lagérlarni herqaysi jaylardiki kishilerge höner-téxnika ögitidighan “Kespiy terbiyelesh mektipi” dep aqlap kelmekte idi. Nöwette xoten sheherlik hökümetning “Éshincha emgek küchi” dep atiliwatqan bir türküm Uyghur yashlirini bu yil qish peslidin bashlap “Ishqa orunlishish” namida “Kespiy terbiyelesh” ke orunlashturghanliqi melum boldi.

“Xoten sheherlik hökümet tori” ning 7-yanwardiki xewiride éytilishiche, sheherlik hökümet Uyghur yashlirini “Kespiy terbiyelesh” ke ewetishni “Namratliqni yoqitip, yashlarning igilik tiklishige yardem bérish” dep teshwiq qilmaqta iken. Shuningdek bu “Terbiyelesh” ning pütünley heqsiz ikenliki, bu yerde “Éshincha emgek küchliri” ning höner-téxnika öginip oqush püttürgendin kéyin ongayla bextlik turmushqa érishidighanliqini tekitlep kelmekte iken.

Xoten sheherlik “Kespiy terbiyelesh mektipi” ning mudiri bu heqte söz qilip “Hazir 420 oqughuchi özini tizimlatti. Ular oqush püttürgendin kéyin a'iliwi bextini ongayla tapalaydu” dégen.

Halbuki bu xil “Terbiyelesh” ning heqiqiy mahiyiti heqqide köpligen uchurlar otturigha chiqiwatqan bolup, xelq'arada lagérlarni taqash heqqide chuqanlar bésilmaywatqanda yéngidin yüzligen Uyghurning “Éshincha emgek küchi” namida “Terbiyelesh” ke ewetilishi analizchilarning gumanini qozghimaqta.