Xitay da'iriliri xotendin 1800 neper Uyghur ishlemchini ürümchi, sanji qatarliq jaylargha yötkigen

Muxbirimiz erkin
2020-03-16
Share

Xitay hökümiti Uyghur aptonom rayonining jenubidin Uyghur yashlirini “Éshincha emgek küchi” namida dawamliq rayonning ichi-sirtidiki xitay karxanilirigha yötkimekte.

Xitay taratqulirining ashkarilishiche, ötken heptining axiri xotendin yene 1800 neper Uyghur ishlemchi ürümchi we sanji qatarliq jaylargha yötkelgen. “Shinjang géziti” ning bu heqtiki xewiride, ishlemchilerning 1000 nepirining ürümchidiki, 800 nepirining sanjidiki karxanilargha yötkelgenliki bildürülgen.

Xitay hökümiti ötken yili 12‏-ayning axirliri xitayning wuxen shehiride korona wirusi partlap, pütün xitayni qaplighandin kéyin qattiq bixeterlik tedbirlirini yolgha qoyghan. Nurghun ölke, sheher, yéza-kentler qamal qilinip, zawut-karxanilar ishtin toxtighan, idare-jem'iyet we mektepler taqalghan. Puqralarning talagha chiqishi cheklen'gen bolsimu, lékin da'iriler mushundaq nazuk mezgilde Uyghur aptonom rayonining jenubigha jaylashqan 3 wilayet bir oblasttin Uyghur “Éshincha emgek küchliri” ni Uyghur rayonining ichi-sirtigha keng kölemlik yötkeshke bashlighan. Tunji türkümde 2‏-ayning 22‏-küni xotendin 171 Uyghur ishchi xunenning changsha shehirige yolgha sélin'ghan. Xitayning bu herikiti Uyghur kishilik hoquq teshkilatlirining qattiq tenqidige uchrap, ularda xitayning meqsitige qarita so'al peyda qilghan. Ular xitay da'irilirini mezkur Uyghur yashlirini korona wirusi partlighan rayonlargha yolgha sélip, “Ularning hayatigha tewekkül qilish” bilen eyibligenidi.

“Shinjang géziti” ning ilgiri sürüshiche, 14‏-mart küni poyizda ürümchige qarap yolgha chiqqan ishlemchilerning 1000 nepiri ürümchining 7 rayoni, bir nahiyesidiki karxanilargha, qalghan 800 neper ishlemchi sanji shehiri, manas nahiyesi we 3 sana'et rayonigha orunlashturulidiken. Lékin xewerde, ularning konkrét qaysi karxanilarda ishleydighanliqi tilgha élinmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet