Хитай даирилири уйғур “йеза ешинчә әмгәк күчлири” ни йөткәшни давамлиқ күчәйтмәктә

• Мухбиримиз әркин
  2019-04-05

Хитай һөкүмити уйғур районидики “йеза ешинчә йеза әмгәк күчлири” ни йөткәп ишқа орунлаштуруш намида яш уйғур йеза әмгәк күчлирини йөткәшни давамлиқ күчәйтмәктә.

Уйғур аптоном районлуқ адәм байлиқи вә иҗтимаий параванлиқ назаритиниң хитай таратқулириға ашкарилишичә, даириләр бу йилниң дәсләпки 3 ейида 520 миң 660 нәпәр “йеза ешинчә әмгәк күчи” ни йөткигән. Даириләр шинхуа агентлиқиға бәргән учурида бу әмгәк күчлириниң қайсий районларға вә қандақ хизмәт орунлириға йөткәлгәнликини тилға алмиған.

Уйғур кишилик һоқуқ тәшкилатлириниң илгири сүрүшичә, хитай һөкүмити “йеза ешинчә әмгәк күчлири” ни ишқа орунлаштуруш намида тәшкиллик һалда хитай өлкилиригә вә райондики санаәт базилириға йөткәп, уйғур йеза яшлирини җәнубтики вилайәт-областлардин башқа районларға тарқақлаштурмақта икән. Уйғур аптоном районлуқ партком бу йил “йеза ешинчә әмгәк күчлири” ни йөткәшни 2 милйон 700 миң адәм қетимға йәткүзүшни пиланлиған. Даириләр өткән йили 2 милйон 800 миң “йеза ешинчә әмгәк күчи” ни йөткигән иди.

Шинхуа агентлиқиниң хәвиридә ашкарилишичә, бу йилниң дәсләпки 3 ейида йәнә җәнубтики 3 вилайәт бир областта 45 миң адәм ишқа орунлишип, өткән йилниң охшаш мәзгилидин 30 пирсәнттин артуқ ашқан. Хитай даирилири өткән йилниң ахирлири вә бу йилниң башлирида уйғурлар зич олтурушлуқ җәнубтики вилайәт‏-областларға ичкири хитай өлкилиридин зор түркүмдә хизмәтчи қобул қилиш еланлирини чиқарған. Көзәткүчиләрниң илгири сүрүшичә, хитай һөкүмити лагер сиртидики “уйғур йеза әмгәк күчлири” ни башқа районларға йөткәп, лагерға соланған уйғурларниң хизмәт орнини ичкири хитайдин йөткәп кәлгән хитайлар билән толдурмақта икән.